Einisch hets en Stichentscheid vom Präsident bruuchd

Zunächscht hets bi de hütige Iiwohnerrotssitzig en Überraschig geh: De bisherig SP-Iiwohnerrot Martin Spörri politisiirt noi als Parteiloser und het au sin Sitzplatz gwächslet. Er sitzt jetzt zwüsche de CVP und de FDP und het interessanterwiis sis Abstimmigsverhalte sinere Umgebig aapassd.

D Kreditabrechnige für d Ufstockig vo drü Schuelhüüser im Margi und de Photovoltaik uf en Dach vo dere Schuelaalag sind im Prinzip unbestritte gsi, hend aber gliichwohl einigi Wortmeldige nach sich zoge. D Kredit sind dann eistimmig aagnoh worde.

Bi de Behandlig vom Poschtulat vo de FDP, wo d Choschte vo Vorstöss hette sölle transparent werde. De Gmeindrot het für d Abschribig plädiirt  und Gschäftsprüefigskommission (GPK) het sich eistimmig im Gmeindrot aagschlosse gha. D FDP het aber welle am Poschtulat feschthalte, so dass es e usführlichi Diskussion geh het. Bi de Abstimmig sind di meischte Fraktione im Gmeindrot gfolged, während d Fraktion SVP eistimmig und di vo de FDP fascht eistimmig de Aatrag vom Gmeindrot abglehnt het.

S Poschtulat vo de Fraktion SP/WettiGrüen, wo d Nutzig vom Gluri Suter Huus het welle fördere, isch vom Gmeindrot ebefalls zur Ablehnig empfohle worde. D SP het de Ablehnig nöd widersproche, so dass das Postulat abgschribe worde isch.

De Andreas Benz (CVP) isch für mit de Abschibig vo sim Poschtulat nöd z fride gsi. Globt het er d Stellignahm vom Gmeindrot zu allfällige Verlegige vo Sportstätte. Anderi Berich hend em aber gfehld und au de Gmeindsamaa Markus Dieth het klar gsait, dass wenn e breiteri Abklärig gwünscht sig, müessi me d Abschribig ablehne, was de Rot mit 25 zu 18 Stimme au gmached het.

S Poschtulat vom Leo Scherer (WettiGrüen) zur Abklärig von ere Strahlebelaschtig im Fall vomene Totalversage vo Beznau 1,het de Gmeindrot entgege gnoh. De Markus Dieth het klar gmached, dass es e wichtigs Thema sig, aber d Kompetenze nöd allei bi de Gmeind lige und vo daher offe sig, wi usführlich d Antwort dät usfalle. De Christian Pauli (FDP) het für d Fraktion en Aatrag uf Rückwisig gstellt, wil es us sinere Sicht em Angschtmache vo de Bevölkerig dient, bevor überhaupt entschide sig, ob Beznau 1 überhaupt wider ans Netz gängdi. Au de Thomas Benz (CVP) isch für e Rückwisig gsi. Er het zwar d Froge berechtiged gfunde, aber    de Wettiger Iiwohnerrot s falsche Gremium gfunde, um di Frog z stelle. Da s es regionals Thema sig, wär en Vorstoss im Grosse Rot passender. De Holger Czerwenka hat aagmerkt, dass es doch spannend sig, dass d FDP immer für Transparenz sig, i dem Fall aber nöd. D Abstimmig isch dann denkbar knapp gsi. D Fraktione SP/WettiGrüen, EVP/Forum, d glp, d BDP und Teili vo de CVP sind mit 21 Stimme für d Überwisig gsi, di Rotsrächte mit 21 Stimme dagäge. Es het au ei Enthaltig geh und zum Schluss het de Präsident müesse de Stichentscheid geh. Er isch für d Überwisig gsi, so dass de Gmeindrot das Poschtulat wird behandle.

Als letschts Poschtulat isch das vo de Faktion CVP und de Marie Louise Reinert zur Zuekunft vo de Blosmusik-Kultur z Wettige. Letschteri het s Poschtulat begründet und de Philippe Rey het für de Gmeindrot d Entgegenahm begründet. S Poschtulat isch in de Folg stillschwigend überwise worde.

Advertisements