Bi de vorletschte Sitzig vom Iiwohnerrot het sich de damalig SP-Iiwohnerrot Martin Spörri kurzfrischtig lah entschuldige, bi de letschte het er als Parteiloser bi de Bürgerliche gsesse und jetzt het er e noii politischi Heimat.
Zerscht isch es noch es Grücht gsi, wo mir vernoh hend. De Martin Spörri wird BDP-Iiwohnerrot. In de Zwischeziit isch das Grücht bstätiged worde. De Michael Merkli, Präsident vo de BDP Wettige und Fraktionspräsident vo de bisherige Ei-Mann-Fraktion im Iiwohnerrot, het bstätiged, dass de Martin Spörri in Zuekunft für d BDP wird politisiire. Wenn d Mitgliderversammlig im Juni zustimmi, wird er au «uf de Grossratsliste Platz neh im vordere Drittel», so de Merkli gegenüber de Wettiger Nochrichte. Au Parteimitgliid wird de Martin Spörri werde.
Bemerkenswert isch nebe de Personalie an sich au de inhaltlich Umschwung, politisiired d SP und BDP ja nöd grad uf de gliiche Linie.
Wettiger Nochrichte 