Rechnig, Recheschaftsbricht und verschidnigi Vorstöss – de Iiwohnerrot het e langi Traktandelischte

Am nächschte Donnschtig, 23. Juni 2016 isch di nächscht Sitzig vom Iiwohnerrot. D Rechnig, de Recheschaftsbricht und en Zwüschebricht zu de LOVA2 werde vermuetlech di meischt Ziit in Aaspruch neh, aber au d Beantwortig vo füf Interpellatione sin traktandiirt.

Gits im Bestattigswese scho vor Abschluss vo de Leischtigsorientiirte Verwaltigsanalyse (LOVA2) en Personalabbau? Das ischs Thema vo einer vo de Interpellatione, wo de Gmeindrot am Donnschtig wird beantworte. Au Interpellatione zu de Standortförderig, em Sozialwese, de Förderig vo Elterebildig und ere “Falschussag” sind traktandiirt.

Gschpanned dörf me au uf d Diskussionen zum Bricht über de Stand vo de LOVA2 si, wo erschti Hiwiis uf allfälligi Sparmöglichkeite dörft geh. Au d  Gnehmigung vo Rechnig und Recheschaftsbricht, wo an sich wohl unbestritte sind, werde d Glägeheit geh, dass d Fraktione ihri unterschidlichi Haltige chönnd zum Usdruck bringe.

Zudem gits en Ersatzwahl für de Gmeindsverband Kehrichtverwertig Region Bade-Brugg für d Amtsperiode 2015/2017. Dafür isch de Rémy Monney vorgschlage, de noi Leiter vom Werkhof, wo au im Gmeindsverband sin Vorgänger söll ersetze.

Advertisements