Sit em 2009 het d Sandra Frauenfelder di damals noi gschaffeni Stell vo de Standortförderig ufbaud. Jetzt verlaht si d Gmeind Wettige uf de Ändi Oktober.
Sibe Johr lang het d Sandra Frauenfelder bi de Gmeind Wettige gschaffed und zämme mit em Gmeindsammaa Markus Dieth d Standortförderig ufbaud. Mit de Wettiger Wirtschaft mit ihrne vile KMU het si sich guet vernetzt und zahlrichi Veraastaltige het si organisiiert und e aktivi Öffentlichkeitsarbet betribe. «Little Wettige» bim Badener Stadtfäscht vo viir Johr, d Iiweihig vom Bahnhof nach em Umbau, aber au de Etappehalt vo de Tour de Suisse hend zu de Ereignis ghört, an dene d Standortförderig massgeblich beteiliged isch gsi.
Ab em 1. Novämber 2016 wird d Sandra Frauenfelder z Uster im Kanton Züri d Standortförderig ufbaue. In ere Mediemitteilig wisst de Gmeindrot druf anne, dass er de Wegzug vo de Sandra Frauenfelder beduuret und es aktivs Marketing und en aktivi Kommunikation witerhin wichtig finded. Er wird e positivi Witerführig im Beriich Marketing und Kommunikation aastrebe.
Wettiger Nochrichte 