Drü Wettiger wend in de Regirigsrot!

Hüt hend sich in Sach Regirigsrotswahle d Nochrichte überschlage bzw. macheds noch. Isch bis hüt am Vormittag numme ein Wettiger offizieller Kandidat für de Regiirogsrot gsi und hets insgsamt sächs Kandidatinne und Kandidate für di füf Sitz geh, sind hüt sit em Mittag no zwei Wettiger dezue cho.

2013-06-05 13.22.12.jpg

S Regirigsrotsgebäud z Aarau

Ma cha es fascht nöd glaube, wenn me en Blick uf d Kandidatinne- und Kandidatelischte für de Regiirigsrot lueged. Sind das nebe de drü amtiirende Regirigsröt Stefan Attiger (FDP, Bade), Urs Hofmann (SP, Aarau) und Alex Hürzeler (SVP, Oeschge) bisher di viir noie Markus Dieth (CVP, Wettige), Franziska Roth (SVP, Brugg) Robert Obrist (Grüene, Schinznach) und Maya Bally (BDP, Hendschike) gsi, sind zum Kandidatefäld hüt no einisch zwei noi dazue cho. Und beidi sind vo Wettige.
Di ei isch d Gmeind- und Nationalrötin Yvonne Feri vo de SP, wo am Mittag ihri Kandidatur bekannt geh het, di ander isch d Grossrötin Ruth Jo. Scheier vo de glp schints au. D Aargauer Zitig Online brichted, dass si hüt am Abe schints söll nominiirt werde. En Tweet vo ihre het scho am Vormittag zu Schpekulatione gführt . Mir sind gschpanned, wer vo de Wettiger KandidatInne s Ränne wird mache. Bim Markus Dieth gilt d Wahl als relativ sicher, d Yvonne Feri und d Roth Jo. Scheier verstönd sich vermuetlich als Kandidatinne für d Nochfolg vo de Susanne Hochueli. Aber wi immer ligt s letschti Wort bi de Stimmbürgerinne und Stimmbürger.

 

Advertisements