Am Donnschtig, 1. September 2016 isch di nächscht Sitzig vom Iiwohnerrot. Einigi gwichtigi Traktande stönd aa, eis davo isch d Saniirig vom Tägi.
Au dismal gits zwei Wächsel im Iiwohnerrot. Für de Holger Czerwenka (Forum5430) wird d Franziska Widmer im Rot Iisitz neh und für d Daniela Gueniat (CVP) d Simona Nicodet. Danach wird s Kreditbegehre vo Fr. 46’530’000.00 für d Saniirig vom Sport- und Erholigszentrum Tägerhard verhandlet. Nach de Fraktionsbricht z urteile, isch d Saniirig letschtendlich unbestritte, mer dörf aber gliichwohl gschpanned si uf d Erlüterige vo de Fraktione zum Thema. No in dem Johr wird d Saniirig vom Tägi au noch vors Volk cho.
En wichitge bedütsame Punkt für Wettige isch de Kommunal Gesamtplan Vercher (KGV), wo zwar numme zur Kenntnis isch, also nöd cha bschlosse oder abglehnt werde, aber gliichwohl ufzeiged, wi de Gmeindrot und de Kanton sich d Verchersentwicklig in de nächschte Johr vorstelled.
Au d Ufnahm vo de Gmeind Bergdietike in d Zivilschutzorganisation und de regional Bevölkerigsschutz stoht uf de Traktandelischte. Das Traktandum isch ebefalls unbestritte und wird vom Rat sicher verabschiidet werde. Es entstönd sinnvolli Synergie, wo zudem hälfed Geld z spare.
Zudem sind am Donnschtabig drü Poschtulat und ei Interpellation traktandiirt.
Wettiger Nochrichte 