D Sitzig vom Iiwohnerrat am Donnschtig, 1. September 2016 het nöd numme s Tägi zum Thema gha. Viir Bschlüss sind sogar eistimmig gfasst worde.
Wi scho brichted, isch nach de Inpflichtnahm vo de Franziska Widmer (Forum 5430) und de Simona Nicodet (CVP) d Saniirig vom Tägi usführlich diskutiirt worde. Aber au nach dere öppe einehalbstünndige Diskussion und ere virtelstündige Pause, het de Rat noch einige Gschäft uf de Traktandelischte gha. Zerscht isch de Kommunal Gsamtplan Vercher (KGV) zu Kenntnis gnoh worde, wo für de Gmeindrat es verbindlichs Planingsinschtrument isch und d Verchersplanig vo de nächschte Jahrzehnt feschtlegt.
Danach isch es um d Integration vo de Gmeind Bergdietike in de Zivilschutz Wettige-Limmigtal und de regional Bevölkerigsschutz und d Zuestimmig zu de jewilige Gmeindsverträg gange. Trotz de fortgschrittene Ziit, het sich s de GPK-Präsident Markus Haas nöd lah neh, zu beidne Pünkt es Votum vo de Gschäftsprüefigskommission abzgeh und het betont, dass er sini Redeziit gnüssi, aber sich gärn würd la unterbräche, falls sis Votum länger würde, wi d Vote vom Orun Palit (glp) und em Michael Merkli (BDP) zum Tägi. Au für sini Fraktion het er s Wort ergriffe, ebeso wi de Lutz Fischer-Lamprecht (EVP/Forum5430), wo im Name vo sinere Fraktion dene danked het, wo fürs Zstandcho vo dene Verträg gschaffed hend. Für ihn isch es es Bischpil für e gueti und sinnvolli Zämmenarbet vo de Gmeinde gsi, bi der Synergie zum Wohl vo allne gnutzt werde. In seltener Iitracht sind alli viir Bschlüss zu dene beide Traktande eistimmig gfasst worde.
Di parlamentarische Vorstöss, wo traktandiirt si gsi, hend dann nüm allzuviil Redezit in Aaspruch gnoh, sodass d Iiwohnerät nach öppe drü Stund de wohlverdient Fiirabig hend chönne aaträte.
Wettiger Nochrichte 