De Philippe Rey verzichtet uf e Kandidatur zum Gmeindamma

Am 18. Dezember 2016 wird z Wettige de Nachfolger vom Markus Dieth gwählt. Bi de Ammawahle gits wohl numme ein Kandidat. Bim Gmeindrat isch es no offe.

D CVP het hüt am Abe d Nominationsversammlig, aber es isch so guet wi sicher, dass d Partei de Roli Kuster als Kandidat für de Gmeindamma und de Roli Michel für d Nachfolg als Gmeindrat wird nominiire. Scho vor längerer Ziit hend uf d Frag, ob si sich e Kandidatur chönnd vorstelle, de Daniel Huser (SVP) und d Antoinette Eckert (FDP) abgwunke, kürzlich au de Markus Maibach (SP) und geschter de parteilos Philippe Rey. Damit wird ausser em Roli Kuster keine vo de amtiirende Gmeindrät als Gmeindamma kandidiire. Anderi Kandidate sind für das Amt nöd z erwarte.

E chli anderscht gsehts bim Gmeindratssitz us. D SVP, d glp, d EVP, d SP und noi au s Forum 5430 hend erklärt, dass si nöd zur Wahl aaträte. Bi de BDP isch es no offe und FDP het – wi d CVP – hüt am Abe e usserordentlichi GV. D ParteiPräsidentin Yvonne Vogel het vilsagend gmeint, d FDP hetti Interesse und au geigneti Kandidate.

Mir bliibed für oich am Ball 😉

Advertisements