De Iiwohnerrat hat am Donnschtig, 17. November 2016 di zweitletscht Sitzig vom Johr gha. Bsunders d Schuelruumplanig het z rede geh.

Nach de Gratulation vom Präsident vom Iiwohnerrat, em Paul Koller a de noi gwählt Regiirigsrat Markus Dieth und de Inpflichtnahm vom René Wyss (CVP) als noie Iiwohnerrat, het de Rat de Zwüschebricht Schuelruumplanig bis 2030 diskutiirt. Alli Fraktione hend di gründlich Arbet globt, wo d Erarbeitig vom Zwüschebricht bruuchd het. Bim Thema Klassegrössi, wo me en Aanahm träffe muess, um de Bedarf a Rüüm chönne z berechne, da sind Meinige usenand gange und au d Frog, für was de Kredit, wo im 2015 gschproche worde isch, im Witere genau set bruuchd werde, het zu Diskussione gführt. De Aatrag vo de SP, wo verschideni Variante het welle berechne la, isch abglehnt worde und aaschlissend de erscht Aatrag vom Gmeindrat, de Zwüschebricht zur Kenntnis z neh, eistimmig aagnoh. Bim zweite Aatrag het sich d CVP duregsetzt, wo für de Schlussbricht numme d Modul 5-9 wot umgsetzt ha.

Bi de Teiländerig Nutzigsplanig Landstroos isch es dann harmonischer zu und hergange. Alli Fraktione hend de Prozess, wo zum Masterplan Landstroos und damit au zum Aatrag vo de Teiländerig vo de Nutzigsplanig, globt und de Rat het bi einere Enthaltig d Teiländerig bschlosse. Di beide nächschte Traktande, s Reglement über d Spil- und Erholigsfläche und d Teiländerig Nutzigsplanig Margeläcker sind eistimmig gnehmiged worde.