De tüürscht Hot Dog vo de Wält chunnt us Wettige

Heissihønd sind «in aller Munde»! En Hot Dog us Wettige bschäftiged sit e paar Tag d Medie, au im Usland. Nebem Blick und em Tagi het au s dütschi Magazin «Stern»!, e niderländischi Website und di welsch Zitig «Le Matin» über de Luxus-Hotdog brichted.

image1.JPG250 Stutz für en Hot-Dog, so liist me ungläubig in de Zitig. Isch das Satire, en Marketing-Gag oder ernscht gmeint? Letschteres uf jede Fall au, denn de Hot Dog gits würkli, we me soviel Geld wot in d Fingere neh. We me eine im Wiehnachtsdörfli uf em Sechselüteplatz bstellt, muess me 40 Minute warte. D Wurscht wird nämli in ere Metzg a de Bahnhofstroos z Wettige us em Fleisch vomene Kobe-Rind hergschtellt und frisch uf Züri brochd. Das Fleisch isch s tüürschte uf de Wält, will d Rinder z Japan unter bsundere Bedingige werde ghalte und dütlich meh Läbesziit hend, wi anderi Schlachtrinder. Au s Brötli, wo vom Spitzbueb z Wettige hergstellt wird, isch es speziells mit Safran dinne. Au schuscht het einiges an Luxus in sich: Trüffel us Alba und Roederer-Cristal-Champagner. Alles in allem macht das de stolze Priis us. En Teil vom Erlös  vom Hot-Dog-Verchauf goht übrigens an de Schwiizer Verein Mütter ohne Grenzen.
D Firma, wo hinter dem Luxus-Hot-Dog stoht, isch z Wettige diheime, jedefalls bald. D Jasmin Feierabend sait «oisi dänische Hot Dog, Waffle und Smørrebrød beziehnd mir fasch alles in und um Wettige – das isch ois wichtig! Alli chönd ois weltwiit für Aaläss bueche und bald chönd alli a dä Weberstr. 8 in Wettige oisi huusgmachte Delikatesse & dänischi Hot Dog koschte & poschte.»

 

 

 

 

Advertisements