De Max Knecht isch gschtorbe 

Kurz vor em Jahreswechsel esch de erscht Wettiger Iiwohnerratspräsident, de Max Knecht, gschtorbe. Das het sin Sohn, de Christian Knecht uf Facebook bekannt geh und stoht au uf de Website vom Max Knecht.

De Max Knecht (Screenshot vo sinere Website)

Im 2016 het Wettige d Iiführig vom Iiwohnerrat im 1966 gfiired. De Max Knecht isch damals zum erschte Iiwohnerratspräsident gwählt worde.

Uf d Wält cho esch er im 1929 z Schneisige. D Bezirksschuel het er z Endige bsuecht und s Gymnasium z Stans. Danach het er z Fryburg im Üechtland, z Paris und z Züri Jus studiirt. Im 1955 het er ghürate und z Döttige es Aawalts- und Notariatsbüro eröffnet, mit dem er drü Joht spöter uf Wettige züglet esch. Im 1965 esch er in de Grossi Rat vom Kanton Aargau gwählt worde, den er eis Jahr (1973) au präsidiirt het. Im 1985 esch er usem Grosse Rat usgschide.

Bis z letscht het de Max Knecht Wahlprognose erstellt, wo er uf sinere Website veröffentlicht het und wo regelmässig au vom Badener Tagblatt vor Wahle veröffentlicht worde sind. Sini letschti Prognose esch für d Grossratswahl im Oktober 2016 gsi und er esch sehr stolz gsi, wenn sini Prognose nöch am tatsächliche Resultat glege sind.

Advertisements