Bi de erschte Stimmbürgerinne und Stimmbürger sind d Abstimmigscouvert scho iitroffe. Zwei Abstimmigsvorlage betreffed de Finanzusgliich zwüsche de Gmeinde. D Gmeinde Wettige und Noiehof laded zuere Infoveraastaltig zum Thema ii.
finanzusgliichAm 12. Februar 2017 entscheidet sich, wi es mit em Finanzusgliich witergaht. Di komplex Vorlag chunnt vors Stimmvolk und wil d Folge für di verschidnige Gmeinde sehr unterschiidlich sind, isch de Finanzusgliich sehr umstritte. 35 Prozent werded mit em noie FInanzusgliich günschtiger fahre, für 15 Prozent wirds tüürer und für de Rescht vo de Gmeinde blibt di finanziell Belaschtig öppe gliich. Wettige ghört zu de Gmeinde wo sich wenig ändered, wobi d Frag isch, was wenig isch. Es sind um di 1.269.000 Franke, wo Wettige weniger belaschtet wird oder guet zwei Stüürprozent. Zum Vergliiche biete sich zwei Nachbargmeinde aa: Für Noiehof isch de noi Finanzusgliich sehr wichtig und entspricht öppe ere Unterstützig, wo 10 Stüürprozent usmacht, während Würelos d Stüüre um eis Prozent wird müesse erhöhe.
De noi Finanzusgliich isch es ganze Massnahmepaket und uf em Stimmzettel vom Kanton gits grad zwei Abstimmige, wo mitenand verknüpft sind. In de erschte gohts um en Ufgabeverschiebig und Übergangsbiiträg. D Finanziirig vo Ufgabe sölled so zwüsche Kanton und Gmeinde ufteilt werde, dass di jewilig Staatsebeni für di Ufgab zahlt, für di si zuständig isch. So wird de öffentlich Verkehr, wo zur Ziit zu 40% vo de Gmeinde mitfinanziirt wird, ganz vom Kanton finanziirt werde. Uf de andere Site gits für d Sozialhilfekoschte kei Kantonsbiiträg meh. Insgsamt führt die Noiverteilig vo de Koschte zu ere Mehrbelaschtig uf de Siite vom Kanton um 41 Millione Franke, um di d Gmeinde gliichzit entlaschtet werde. Dadefür sell aber de Stüürfuewss vom Kanton um 3 Prozent stiige, während d Gmeinde ihre um drü Pünkt müend senke. D Stüürbelaschtig bliibt für d Bürgerinne und Bürger dadurch di gliich. Und falls en Gmeindrat die Senkig nöd wot, dann muess er e Stüürerhöchig beaatrage.
De noi Finanzusgliich orientiirt sich am Grundmodell vom Bundesfinanzusgliich. Es söll en Ressource- und en Laschteusgliich geh. De Ressourceusgliich überchömmed dann Gmeinde, wo en unterdurchschnittlichi Finanzkraft hend und di mit ere überdurchschnittliche müend iizahle. Bim Ladchteusgliich werde noi au d Usgabe für Soziallaschte und d Bildig berücksichtiged, was bisher nöd de Fall gsi isch. Dass de Finanzusgliich in de bisherige Form nöd zuekunftstauglich isch, darüber sind sich Gegner und Befürworter vo de Vorlag einig. De Grossi Rat het di noi Ufgabeverteilig mit 96:32 Stimme angnoh und de Finanzusgliich mit 96:30 Stimme.
D Gemein Wettig eund d Gmeind Noiehof lad in Vebrindig mit de Ortspartei zu ere Infoveraastaltig zum Thema ii. Si finded am Mentig, 30. Januar 2017 um halbiachti im Rathuussaal z Wettige statt.