Vo de Tägerhardstross her wird zur Ziit e noii Zuefahrt zum Kieswerk vo de Tägerhard Kies AG baued. Vorrussichtlich im Mai werded d Bauarbeite absgschlosse si.

D Bauarbeite für e noii Zuefahrt hend direkt mit zwei Verchersprojäkt z due, wo widerum mitenand verhängd sind. S erschti esch di eiged Busspur, wo vo Würelos her de ÖV vo Verspätige entlaschte sell. De Bus wird dete durch di eiged Spur und e Lichtsignalaalag gegenüber em Individualvercher bevorzugd. Will das zu ere Verlagerig vom Vercher vo de Landstross uf d Tägerhardstross würd führe, wird au im Tägi e Lichtsignalaalag installiird, wo d Fahrzüüg dosiirt uf Wettige inelaht. Das wird in de Stossziit zumene Stau führe, wo dann widerum d Usfahrt vom Kieswerk würd blockiire. Us dem Grund gits bim Kieswerk di noi Zuefahrt.
Vor Ort esch ois vo de Wettiger Nochrichte ufgfalle, dass d Zuefahrt en optisch schöni Steiverchleidig überchunnt. De Simon Bürgler, Gschäftsführer vo de Tägerhard Kies AG meint dazue: «D Steiverchleidig isch einersitz es Zeiche vo eus, de Rostoff wo 100 % Natur isch z präsentiere und glichziitig de verschiedenste Läbewäse en durhafte Läbensrum z biete uf eusem Gländ. Mer realisiered au underem Johr verschiedeni Massnahme und Stelle eusi Produktion uf d Entwicklige  ide Johresziit ab.»

Für ökologisch Interesiirti scho jetzt en Hiwiis: De Läbesruum Kiesgrueb esch vilfältiger, wi me uf de erschte Blick meint. Das cha me bimene «thematische Spaziirgang» am 2. September am Vormittag erläbe. Nöchers erfahred ihr rechtzitig uf de Wettiger Nochrichte.