CVP Wettige nominiirt de Brödlimeischter für de Gmeindrot

Vorgeschter hät d CVP Bade de Markus Schneider zum Kandidat für d Wahl zum Stadtamme kürt. De Bernhard Schmid, Brödlimeischter vo de Spanischbrödli Zunft hät mit 52 zu 21 Stimme de kürzere zoge. Dahinter steckt e gschickti Strategie von de CVP.

Screenshot vo de CVP-Website

De Brödlimeischter bsitzt sowohl über sini Partei- wi über d Stadtgränze vo Bade use, grossi Sympathie. So erstunt es uf de erschti Blick, dass er bi de Abstimmig vom Donnschtig, 30. März 2017 für d Nomination relativ wenig Stimme übercho hät. Was uf de erschti Blick de Iidruck machd, d CVP Bade sig muetlos an d Nomination anne gange, het en völlig anderen Hintergrund, wi jetzt use cho esch.
E gheimi Aktenotiz, wo euserm Medium vorligd, zeiged, dass bi de Badener CVP öppis in de interne Kommunikation nöd gstumme het. D Nomination vom Markus Schneider esch nämlich planed gsi, het aber vil knapper selle usgah. De Bernhard Schmid hät sich nämlich im Vorfäld bereit erklärt gha, de schwächelnde CVP Wettige us de Klemme z hälfe. Di esch ja uf de Suechi nach eme Kandidat für de Gmeindrat, wo d Kompetenz und de Wille het, bi de Wahle am 24. September 2017 de an d FDP verloreni Sitz zruckzhole. Bereits Endi April, so esch usecho, wot de Bernhard Schmid e Ligeschaft a de Schartefelsstrass beziehe, wo knapp a de Stadtgränze z Bade ligd. Ere Kandidatur, wo lut politische Beobachter beschti Chance uf e Wahl bietet, stoht dadermit nüd me im Wäg.

Advertisements