Zur Zitt send einige i de Umgäbig am Bau vonere Bar oder öppis ähnlichem, vor allem für die kommendi Badefahrt . Ned so d Handballer vom SV Lägere!
Vor ca. 4 Johr, hed‘s am Wettigerfäscht e neui Bar gä, uf em rote Platz …
d Chlosterbar vo de Handballer vom SV Lägere. Nachem letschte Wettiger-Fäscht esch di Bar aber für immer in Rente gschickt worde.
Under de Füehrig vom Toni Fleischmann und em Martin Thalmann, und eme Team vo 6 Lütt, esch es glunge e neui Bar z entwerfe wo vom Verein akzeptiert worde esch.

Sit em 13. Mai wird jetzt jede Samschtig flissig dra g’saged, g’schrubed, g’moled und hin und her g’schlepped. Di neui Bar, wo  Grundflächi vo 285 Quadratmeter het und us 8.5 Tonne Holz und einere Tonne Stahlteili bestoht, söll denn us ca. 750 Einzelteil e Woche vor em Wettiger-Fäscht uf em rot Platz s ersti mol ufgstellt werde.

Mer wünsched im SV Lägere witer veel Spass bem Bau vo dere neue Bar und hoffed uf witeri Neuigkeite vom Fortschritt vom Bau vo der neue Bar…