Spatestich für d Margi-Turnhalle

Am Mentig, 22. Mai 2017 het im Margelächer de Spatestich für di noi Drühfachturnhalle stattgfunde. Es sell s letschti Noibauprojekt für di nächschte zäh Johr si.
Bi sinere Begrüessig het de Gmeindrot Daniel Huser (SVP) d Medieverträter und d Gäscht us Politik und Baufirmene mitgnoh zu eme kurze Rückblick uf di einzelne Statione , wo de Bau vo de Drüfachturnhalle in de letschte Johr gnoh het. Es esch s letschti vo einige Grossprojäkt, wo für d Wettiger Schuel in de letschte 12 Johr realisiirt worde sind. 80 Millione Franke het d Gmeind in de letschte 12 Johr inverschtiirt.
Nach em Daniel Huser het de Architekt Adrian Twerenbold kurz s Wort ergriffe und sinere Hoffnung Usdruck verliehe, dass de Bau unfallfrei set erstellt werde.
Dann esch de Spatestich dra gsi. Nün Manner hend Hand aagled, um de erschti Spatestich uszführe, d Frau sind unter de Zueschauer blibe. E chli meh Erde esch bewegt worde, wo de Urs Meier, Verwaltigsrotspräsident vo de Eduard Meier AG, di Aawesende iiglade het, de Bagger z bediene – unter sachkundiger Aaleitig natürlich. Di Chance hend einigi vo de Aawesende gärn gnützt und mit emem Apéro esch de Spateschtich dann z End gange.

Advertisements