Schuelpfläg wird definitiv verchlinered

Was sich scho mit de Abstimmig im Iiwohnerrot abzeichend het esch jetzt klar: d Wettiger Schuelpfläg het ab de noie Legislatur numme no füf Mitglider. 

Zur Ziit het d Schuelpfläg z Wettige sibe Mitglider. In sinere März-Sitzig het de Iiwohnerrot bschlosse, d Behörde uf füf Mitglider z reduziire. Wil d Reduktion im Rot unbeschtritte gsi esch, het me damit chönne rächne, dass au d Bevölkerig d notwendig Änderig vo de Gmeinsordnig unterstützt.

So esch es jetzt au gsi. Bi de hütige Abstimmig hend 4’525 Stimmberechtigti für d Reduktion gstimmd, 822 dagege. D Stimmbeteiligung het bi 43.3% gläge.

De Bschluss vo de gliiche Iiwohnerrotssitzig zur Reduktion vo de Bezüg vo de Schuelpfläg, gege den d EVP erfolgriich s Referendum ergriffe het, chunnt am 24. September 2017 vors Volk.

Advertisements