Vo Schuelpfläg, Kranfahrzüg und Strosse

Bi de geschtrige Sitzig vom Iiwohnerrot hets teilwis heftige Diskussione geh. Aber au Eistimmigkeit.

D Judith Gähler (FDP), de Serafino Mannarino (CVP) und d Mia Gujer (SP) (Foti: zVg)

Scho im Vorfeld het meine dervo chönne usgah, dass es ein lange Abe wird, wo em Iiwohnerrot bevorstoht. D Traktandelischte esch lang gsi und einigi Geschäft sehr umstritte.
Während Reduktion vo de Aazahl Mitglider vo de Schul vo 7 uf 5 unbeschtritte gsi esch, esch d Frog von de Entschädigung vo de Schuelpfläg kontrovers und teilwis emotional gloffe. De Aatrag vom Gmeindrot, s Präsidium mit 30’000.- und di andere Mitglider mit 10’000.- Franke z entschädige, het bi de Mehrheit vom Rot keis Ghör gfunde. So esch d Entschädigung uf 20’000.-/8’000.- reduziirt worde.

Ebenfalls umstritte esch d Aaschaffig vomene Kranfahrzüg für de Werkhof gsi. De Bedarf als solche esch unbestritte gsi und zum Schluss het de Rot d Aaschaffig au eistimmig gnehmiged, aber vorher het d Fraktion CVP en Aatrag uf Rückwisig vom Gschäft gstellt, um di finanzielle Konsequenze besser chönne abzkläre und au privatwirtschaftlichi Alternative vertüüfd mit iizbeziehe.

D Notwendigkeit von de Saniirig vo de Halbarte-/Hardstroos esch ebefalls unbestritte gsi, wobi d Fraktion SVP e Strichig von de Umgebigsgstaltig mit Boim und Bluemerabatte beatrait het. De Aatrag esch aber vo ere grosse Mehrheit vom Rot abglehnt worde und s Projek aagnoh.

D Kreditabrechnige vo viir Bauprojekt het de Rat gärn entgegegnoh, hend doch alli mit ere dütliche Koschteunterschritig chönne realisiirt werde.

Im Rot sind au drü noii Mitglider in Pflicht gnoh worde (s. Foti obe) und de Rot het e Motion vom Roli Michel für es Jubiläumsjohr 2020 zu 975 Johr Wettige in es Postulat umgewandelt, wo de Gmeindrot entgege gnoh het.

Advertisements