EVP het hüt s Referendum iigreicht

D Initiantin vom Referendum gege di dütlichi Reduktion vo de Entschädigung vo de Schuelpfläg, d Marie Louise Reinert (EVP), het hüt zämme mit Hälferinne und Hälfer, wo bim Unterschrifte sammle gholfe hend, d Unterschrifte em Gmeindamaa überreicht. 1567 Unterschrifte sind zämme cho.

2017-05-02 10.14.20.jpg

E glücklichi Initiantin: d Marie Louise Reinert

Wer es Referendum gege en Bschluss vom Iiwohnerrot wot ergriife, muess innerhalb vo 30 Täg d Unterschrifte vo 10% vo de Stimmbevölkerig sammle, wo e Volksabstimmig über de Bschluss fordere. Das wäre aktuell 1252. D EVP het mit Unterstützig vo ganz vile Lüt 1567 Unterschrifte zämme brochd und hüt am Morge vor em Rothuus em Gmeindamma Roland Kuster überreicht. D Marie Louise Reinert isch sichtlich stolz gsi, dass es in dere kurze Ziit glunge isch, so vil Unterstützig z übercho, sind doch au no d Früehligsferie in dere 30-Täg-Frischt gläge.

D Iiwohnerkontrolle wird jetzt d Unterschrifte prüefe und dann im Gmeindrot mitteile, wi vil gültige Unterschrifte vorliged. Gegenüber em Badener Tagblatt het de Roland Kuster gmeint, ufgrund vo de höche Aazahl Unterschrifte göng er davo us, dass s Referendum z stand cho sig, au wenn vilicht nöd alli Unzterschrifte gültig siged. D Abstimmig wird vorussichtlich am 24. September 2017 stattfinde, also am gliiche Tag, a dem au d Gsamternoierigswahle vo de Schulelpfläg, im Gmeind- und em Iiwohnerrat stattfinded.

Advertisements