Am 1. Juni 2017 het d EVP im Rothuus ihri Nominationsversammlig gha. D Partei wird bi allne viir Wahle, wo am 24. September stattfinde, teilneh.
Sowohl für de Iiwohnerrat, wi au für d Stüürkommission, d Schuelpfläg und de Gmeindrat schickt d EVP Kandidate ins Renne, so informiirt d Partei in ere Mediemitteilig. In de Stüürkommission esch d Partei bisher durch de Urs Peter als Ersatzmitglid verträte gsi. Noi kandidiirt de 37-jährig Lukas Wampfler. Zudem esch d Schuelpflägerin Hanna Läng bestätiged worde, wo bereit esch, sich au nach de Verchlinerig vo de Behörde von sibe uf föif Mitglider zur Verfüegig z stelle und ihri erfolgrichi Arbet fortzsetze.
Wi vo de Findigskommission und em Vorstand vorgschlage, esch de Lutz Fischer-Lamprecht als Kandidat für de Gmeindrat nominiirt worde. D Partei esch überzügt: de Lutz Fischer- Lamprecht het d Fähigkeite zumene kompetente, präsente, gschprächsbreite Gmeindrat. Er stoht mit de Bevölkerig ineme guete Kontakt und esch viilsitig vernetzt, so d Partei witer.
Au nominiirt worde sind d Kandidatinne und d Kandidate für de Iiwohnerrat. Drü Fraue und acht Manner hend sich bi de Nominationsveraastaltig vorgstellt und es esch es Bild von ere grosse Vilsitigkeit an Läbeserfahrig und Bildigshorizont entstande, Akzent und Aalige vo unabhängige Mönsche, wi d Fraktionspräsidentin Marie Louise Reinert feschtgschtellt het. Im Ustuusch vo Gedanke hetti sich d Vorussetzige für es gmeinsams Engagement ergäh. D Kandidate chömmed us em Finanzsektor, us de Wirtschaft, de Schuel, Pfläg und Sozialarbet. Es kandidiired d Marie Madeleine Minder, de Jay Padiyath, de Harald Meder, de Bernd Gellert, de Christoph Fäs, de Klaus-Peter Brand, de Lukas Rechsteiner. Zudem kandidiire di drü bisherige Iiwohnerrät Marie Louise Reinert, Hanna Läng und Lutz Fischer-Lamprecht und de ehemalig Schuelpfläger Eric Killer.