Wi mir scho am Vormittag brichted hend, sin Szene für e Folg vo de 6. Staffel vom Bestatter z Wettige gfilmed worde. De Ufwand dafür isch imens gsi.
Drü Minute und füfeviirzg Sekunde sind es schints insgesamt, wo da hüt ufzeichned worde sind, het de Fabi usegfunde. Dafür sind scho am Morge um Sächsi di erschte Fahrzüüg cho, für di bim Schuelhuus Alteburg und bim reformiirte Chilegmeindshuus Parkplätz sind reserviirt gsi. Au en Caterer isch hinter de Chile uf em Parkplatz parat gsi und am Set het d Kaffeemaschine nöd dörfe fähle. Dazu isch s ganze Filmequipment cho: Kameras, Mikrophon, Schiiwerfer, Stühel und viles meh. Wer ghoffed het, de Mike Müller alias Luc Conrad chönne z gseh, het vergeblich gwarted. Er het bi dere Szene gar nöd mitgspil. Dafür isch d Barbara Terpoorten alias Kommissarin Anna-Maria Giovanoli vor Ort gsi.
Wann de Sendetermin isch, das wüssed mir nöd, d Staffel started aber schints im Frühjahr 2018.
Wettiger Nochrichte 