Me muess numme di richtige Lüt fröge …

D EVP het im Wahljahr 2017 ihre erscht thematisch Spaziirgang entlang em Dorfbach duregführt. Di 20 Interessiirte hend vili spannendi Informatione übercho. Mit derbi sind au zahlriichi Kandidatinne und Kandidate für d Wahle im September gsi, unter ihne alli amtiirende Iiwohnerröt vo de EVP mit em Gmeindratskandidat Lutz Fischer-Lamprecht.

IMG_6362.JPG

Au am Bächliwäg het es Informatione zu de Pflanze geh.

Me muess numme di richtige Lüt fröge, dann cha me vil nois erfahre. Das isch quasi s Motto vom Spaziirgang entlang em Eigibach/Dorfbach/Gottesgrabe gsi.
Losgange isch es am Moosbächli, wo de Helmut Nowack Mädesüess, Korb- und Salweide, Pfennig- und Goldfingerchrut, Käslichrut und vili andere Pflanze zeigd het. Bim Bruggli vo de Aeschstrass zum Fridhof Brunnewise het de Ernst Nobs über d Geologii a dere Schnittstell zwüsche Mittelland und Jura informiirt und De Jurakalk und s Molassegstei präsentiirt. Uf em Fridhof het de Referent dann d Ufmerksamkeit uf de Wettiger «Pont du Gard» glenkt, di alt Chloschterwasserleitig, wo dete über de Dorfbach führt.

I de Dorfstrass vor em Casino het dann de Bernhard Bruggisser vo de «Jahrhundertflut» im 1955 verzällt. Es settigi Überfluetig sell mit eme Projekt, über das de Iiwohnerrot am Dunschtig, 22. Juni 2017 wird diskutiire, in Zuekunft verhinderd werde. D Iiführig in d Details vom Projekt het d Fraktionspräsidentin Marie Louise Reinert geh und zwar zwüschem Lindeplatz und em Bächliwäg, wo de Dorfbach wider ans Tagesliecht chunnt.

Wider e paar hundert Meter witer het di interessirti Gruppe de Dieter Humbel troffe, wo über Füürsalamander, verschidnigi Frösch und Chrotte, d Ringelnattere und andere Tiir informiirt het, für en Teil vo dene de Bach e wichtigi Verbindig isch. Bim Gottesgrabe isch di letschti Station vom thematische Spaziirgang gsi. Dete hend de Peter Ehrbar und de Reto Wittwer vo de Fischpacht, de Ufzucht vo Bachforelle und ihrne Arbeite zur Ufwertig vom Bach brichted.
De nächscht thematisch Spaziirgang findet am 2. September 2017 vom Zähni bis um Zwölfi im Kieswerk Wettige statt.

Advertisements