Am Donnschtig, 22. Juni 2017 isch de Iiwohnerrot zu sinere 3. Sitzig vom Johr zämme cho. De Rot het allne Vorlage vom Gmeindrot zugschtumme.

D Diskussione über de Recheschaftsbricht und d Rechnig vo de Iiwohnergmeind hend ihri Ziit bruuchd, insbsonderi d Besorgnis vo de Fraktione in Bezug uf di schlechte Finanzlag vo de Gmeind isch dütlich worde. Klar gmerkt het me au, dass d Vorstellige, wi me das chönnd ändere, gönd wir usenand. Das verspricht e kontroversi Diskussion, wenn’s dann ums Budget 2018 goht. Beidi Geschäft sind eistimmig gnehmiged worde.
Bim Aatrag vom Gmeindrot zu de Iiführig von ere gmeindeeigede Betriibergsellschaft für s Sport- und Erholigszentrum Tägerhard (SET) isch es mit de Eistimmigkeit dann vorbi gsi. Nach ere usführliche Diskussion hend 32 Iiwohnerröt für di Umwandlig gschtumme, 12 dagäge und eine het sich enthalte. D Gägestimme sind vo de Fraktion SP/WettiGrüen und Teil vo de SVP cho. D Umwandlig chunnt am 24. September 2017 vors Stimmvolk.

Bim Projektiirigskredit für de Hochwasserschutz isch d Zuestimmig dann fascht bi 100% gläge. Es het nunne ei Gegestimm geh.

Bim Kreditbegehre vo 127’750.- Franke für de Umzug von d Zivilschutzorganisation ins Füürwehrgebäud isch de Umzug an sich unbestritte gsi. Diskussione hets um eini vo de beide Aaträg vo de Fiko gsi: Sell de Zivilschutz mit sine bisherige Möbel ins Füürwehrgebäud zügle oder nois Mobiliar übercho? Di 6’600.- Franke sind letschtlich iigschpart worde, wil de Rot em Aatrag vo de Fiko mit 30 Ja und 15 Nei zugschtumme het.

Danach esch es um eine Motion und zwei Poschtulat gange. (D Sitzig laufd no.)