Jedes Jahr veröffentlicht s Wirtschaftsmagazin «Bilanz» es Städteranking. Wettige isch au derbi und bliibt im erschte Drittel vo de 162 bewertede Städt. Aber d Gmeind landed numme no uf Platz 45.
Jedes Jahr isch Wettige hinter Aarau, Bade und Länzbrg im Schwiizer Städtranking verträte, aber vor Brugg , Rhyfälde und andere Aargauer Gmeinde. Di Position het Wettige chönne hebe, Brugg isch aber gfährlich nöch cho und stoht numme no zwei Plätz hinter Wettige. Us oisere Sicht muess me ja so Rankings immer mit Vorsicht gnüsse. Zum eine gohts ja um de Vergliich zwüsche de Gmeinde, so cha au e Verbesserig vo andere zu ere schlechtere Positioniirig führe. Zum zweite finded nöd jede das guet, wofür es im Ranking Pünkt git.
Jedefalls stelld d «Bilanz» in viir Beriich e verschlecheterige vo de Wettiger Position gegenüber andere Städt fescht. Bi «Bevölkerig und Wohne» isch Wettig enumme no uf Platz 123, bi «Bildig und Erzihig» uf 31, bi «Kultur und Freiziit» uf 96 und bi «Gsundheit und Sicherheit»uf Platz 107. Verbessered het sich Wettige bim «Arbeitsmärt», wo d Gmeind schwiizwiit uf Platz 24 chunnt. Au bi de «Erholig» het Wettige fürschi gmachd und isch uf Platz 111 glanded. Ebeso hets bi de «Iikaufsinfrastruktur», em «Soziale», de «Mobilität» und de «Bsonderheite» Verbesserige geh, wobi Wettige bim letschte Punkt immer noch ufeme bescheidene 122. Platz isch. Gliich blibe isch d Stüürattraktivität, wo Wettige uf Platz 28 vo de 162 Schwiizer Städt ligd.