Fridhofsgärtner verabschiided

Über vili, vili Johr isch de Walter Leutwyler de Leiter vom Friidhof Brunnewise gsi. Di Ära ended jetzt und am letschte Mitwoch hend sich vili Lüt, wo mit ihm in all dene Jahr zammegschaffd hend, mit ere Überraschig vo ihm verabschiided.
En Fridhofsleiter het mit vilne Mönsche Kontakt: Gärtner, Bildhauer, Pfarrer, Pastoralassistente, Bestatter, Musiker und Aaghörige vo Verstorbene. Em Walter Leutwyler isch es immer wichtig gsi, sini Arbeit so z mache, dass sich alli uf em Fridhof willkomme füehle und grad Aaghörigi, wo en schwerer Gang vor oder hinter sich hend, unterstützt und mittrait wüssed.
Wil er das in so grossartiger Wiis gmachd het, isch de Walter Leutwyler vo allne gschätzt worde, wo uf em Fridhof mit ihm z due gha hend. Us dem Grund het sin bisherige Mitarbeiter und Nachfolger, de Patrick Wehrli, zämme mit em Bestattigsamt und Chileverträter e chlini Abschiidsfiir uf em Fridhof  organisiirt. Mit bewegende Wort und Musik hend alli im Walter Leutwyler für sini wichtigi Arbeit danked. Voa ll dem het er im Vorfäld nüd gwüsst gha und entsprechend gross isch d Überraschig gsi, wo er uf de Friidhof cho isch und all di vertraite Gsichter gseh het.
Mir vo de Wettiger Nochrichte wünsched im Walter Leutwyler für sini Pesnioniirig, wo er bald wird chönne gnüsse und danked ihm für alles, wo er für Wettige gleischted het.

Advertisements