De Wahlkampf isch jetzt, zwei Woche vor de Wahl in vollem Gang. Vili Partei sind uf de Strass. Am Fritagabig isch d SP uf em Zentrumsplatz gsi, am Samschtig, 9. September 2017 d glp. Daderbi hend di beide Parteie d Plakatständer vo de Gmeind mit eigede Sujets überdeckt. Das froid nöd alli.
Scho am Fritig am Abig het d SP mit ihre Aktion bi einige Bsuecherinne und Bsuecher es Stirnrunzle usglöst, wo si Plakat vo Kandidate vo andere Parteie mit de eigede Plakat überdeckt het. Wo d Standaktion z Änd gange isch, het d Partei di eigede Plakat wider abgruumed. Ausser em Stirnrunzle het es kei Folge gha.
Ganz anderscht het es am Samschtig usgseh, wo de Präsident vo de glp, de Orun Palit, di «Untat» nöd numme gfötelet, sondern stolz uf Facebook und Twitter präsentiirt het. Es ish nöd lang gange, da het es uf beidne Social-Media-Kanäl entsprechendi Kommentär geh. D CVPler hend das zum gröschte Teil gar nöd luschtig gfunde und schnell isch d Frog uftauchd, ob de Wettiger Wahlkampf jetzt usarti.
Vo «das sind kei Demokrate» über «einfach numme pinlich» und «möchtegern-Politiker» bis zu «Gaht gar nöd…. !!!» isch z läse gsi.
Wi finded ihr das, liebi Läserinne und Läser, eifach wil es so bequem isch, für e paar Stund im Strassewahlkampf di gmeindliche Plakatständer z okkupiire?
Mir sind gspanned uf euri Kommentär hier, uf Facebook oder Twitter.
Wettiger Nochrichte 
Ein Sturm im Wasserglas. Viel übler sind die regelmässigen Nachtbuben (oder -mädchen) Aktivitäten, bei denen systematisch SVP-Plakate mutwillig zerstört werden. Wer keine Argumente hat, muss offenbar Gewalt einsetzen??