S Referendum über d Besoldig vo de Schuelpfläg sig aagnoh worde, so isch hüt in de Printusgab vom Badener Tagblatt z läse. Ganz eso isch es aber nöd, wi en Blick uf d Abstimmigsfrog zeiged.
Wer gege d Kürzig vo de Bezüg vo de Schuelpfläg gsi isch, het sich geschter vilicht uf de erschte Blick gfroied. Uf de Homepage vo de Gmeind stoht in grüener Schrift «angenommen». S Badener Tagblatt schribt dazu, s Referendum sig erfolgriich gsi und mit de Aanahm vom Referendum chämti jetzt de ursprünglich Aatrag vom Gmeindrot zum Träge, wo d Höchi vo de Entlöhnig vo de Schuelpfläger het welle bibhalted. Im Aatrag vom Gmeindrot isch numme d Strichig vo de Zuesatzentlöhnig vom Vizepräsidium und vo de Sitzigsgälder für di ordentliche Sitzige vorgseh gsi.
D Meldig vom Badener Tagblatt isch aber in zweierlei Hisicht falsch, wi oiseri Nochfrog beim Gmeindschriiber Urs Blickentorfer bestätiged het. Über de Aatrag vom Gmeindrot isch nämli gar nöd abgstumme worde, sondern über de Bschluss vom Iiwohnerrot vom 16. März 2017, wo d Entschädigung vom Schuelpflägpräsident um en Drittel und vo de andere Schuelpflägmitglider um en Foiftel kürzt het. Au d Abstimmigsfrog, wo me mit «Ja» oder «Nei» het müesse beantworte, het sich uf de Bschluss vom Iiwohnerrot vom 16. März bezoge. S «Ja», wo vo de Stimmbürgerinne und Stimmbürger 4’142 mol iiglegd worde isch, überwiigd di 1’751 «Nei»- Stimme dütlich. Damit isch de Bschluss vom Iiwohnerrot zu de Schuelpfläg-Entschädigung aagnoh worde und s Referendumskomitee isch gschitered.
Wettiger Nochrichte 