De Stüürfuess blibt gliich, stiigd aber um 3%

Bi de geschtrige Sitzig het de Iiwohnerrot s Budget gnehmiged und en Stüürfuess vo 95% bschlosse. Faktisch isch das e Stüürerhöchig, wo für e schwarzi Null bim Voraaschlag notwendig gsi isch.
Am 12. Februar hend d Aargauerinne und Aargauer de noi Finanzusgliich aagnoh, wo au Verschiebige bi de Stüürfüess zur Folg gha het. Der vom Kanton stiigd um 3%, der vo de Gmeind het selle um 3% sinke. Wil er z Wettige bi 95% bliibd, isch de gliichblibend Stüürfuess faktisch e Stüürerhöchig. Dagege gwehrt het sich vor allem d SVP, wo d Rückwisig vom Budget beaatraid het. Der Aatrag isch im Rat aber chancelos gsi, au will d Überzüügig vorgherrscht het, dass de Gmeindrot durchus Sparwille zeiged het. In ere für e Budgetberotig seltene Einmütigkeit, sind d Kürzigsaaträg vo de Finanzkommission (Fiko) aagnog worde. Numme bi de Kürzig vom Budget für d Standortförderig, wo de Gmeindrot uf 100’000 Franke welle erhöche, während d Fiko uf 50’000.- het welle kürze, isch d Rotsmehrheit de CVP gfolged, wo di 85’000 Franke vom Budget 2017 het welle bhalte. So isch s Budget um fascht 179’000 Franke kürzt worde.
Chancelos isch au de Aatrag vo de SP gsi, wo de Stüürfuess uf 100% het welle erhöche. S letschti Wort zum Voraaschlag und em Stüürfuess het s Volk bi de Amstimmig am 26. November.

Advertisements