«Alles hat ein Ende …»

Am Fritig, 17. und Samschtig, 18. November 2017 isch im reformiirte Chilegmeindhuus wider «Begegnig mit Bazar». Es wird s letschi Mol si.
De Bazar im reformiirte Chilegmeindhuus isch legendär. Es git ihn sit vilne Jahrzehnt und no vor 20 Johr sind jewils vili Lüt vor de Iigangstüre gschtande und hend gwarte,  bis es endlich los goht. D glismete Socke und vili anderi selber gmachti Sache hend denn de Bsitzer gwächslet und de Erlös isch ere wohltätige Organisation gspended worde.
Sither het sich viles gändered, viles isch aber au gliich blibe. Nadisnah hend d Bsuecherström abgnoh, was vor allem mit de veränderte Läbesumständ und em gänderde Kaufverhalte zammehanged.
Wil vili Lüt unter de Woche schaffed het de Bazar statt numme am Donnschtig scho am Mittwoch am Spotnomittag aagfange, damit au Berufstätigi chönd cho. De Name het vo «Bazar» uf «Bazar und Begegnig» und dann uf «Begegnig mit Bazar» gwächslet, um d Verschiebig vom Schwerpunkt dütlich z mache. D Begegnig het selle im Vordergrund stah. Au e Verlegig vo Mittwoch/Donnschtig uf Fritig/Samschtig het kei positivi Uswirkig uf de Bsuech gha, so dass de disjährig Bazar de letscht wird si.
Wer also no einisch «Bazarluft» wot schnuppere, cha das am Fritig, 17. November ab 15 Uhr mache oder am Samschtig, 18. November ab de Zähni. De Erlös isch für d Stiftig Heimgärte z Brugg und d Organisation Schmetterliongskinder bstimmt.

Advertisements