S Kunschtwerk bim noie Gmeinschaftsgrab isch iigweiht worde

Wer öfter emol uf de Friidhof Brunnewise chunnt, dem isch de Pylon, wo sit em Sommer uf em Grabfäld unterhalb vom Engel stoht. Bis Ändi Oktober 2017 sind dann au di andere Teili vom Kunschtwerk dete plaziirt worde. Am Donnschtig, 16. November 2017 isch s Kunschtwerk iigweiht worde.
S Gmeinschaftsgrab uf em Friidhof Brunnewise isch im 1973 iigweiht worde und het Platz für öppe 2000 Urne. Über 90% sind in de Zwischeziit belegd und so het d Gmeind entschide, unterhalb vom bisherige Gmeindschaftsgrab mit em Ängel vom Eduard Spörri es nois Grabfeld mit ere noie Identifikationsfigur z errichte. Das Kunschtwerk isch jetzt iigweiht worde, wobi de Künschtler, de Cesco Peter, viir Gmeindrät, fascht alli Pfärrer und Seelsorger vo de reformiirte und de katholische Chilegmeinde und diversi Mitarbeiter vo de Gmeind aawesend si gsi. Ab em noie Johr isch es möglich, i dem noie Grabfäld beerdiged z werde.
Bi de Iiweihig hend zunächscht di zuständig Gmeindrätin Kirsten Ernst und de Gmeindamme Roland Kuster es Gruesswort ghalte, bevor de Cesco Peter mit de Aawesende sini Gedanke zum Kunschtwerk teild het. Nach de Enthüllig, wo er zämme mit de Kirsten Ernst und em Roland Kuster vorgnoh het, het er au no einigi Wort gsait. Di chönnd ihr hiir im Video losse:

Kirsten Ernst het im Zammehang mit em Kunschtwerk au de Christoph Schlingensief zitiirt: «Kunst wird erst dann interessant, wenn wir vor irgendetwas stehen, das wir nicht restlos erklären können.»

Advertisements