Wer d Baugsuech, wo d Gmeind veröffentlicht, regelmässig aalueged, der wird nöd überrascht si: Au im 2018 sells es Maislabyrinth geh. Dismol würkli uf em Gmeindsbann vo Wettige.
S Maislabyrinth, wo im 2017 a de Alte Otelfingerstrass uf em Gmeindsbann vo Würelos gsi isch, isch vo de beide Buure Andreas Benz und Sandro Sozzi betribe worde. Di beide planed au wider für 2018 es Maislabyrinth, wo dismol a de Landstrass öppe gegenüber vom Kenny’s wird si. Dafür ligd sid em 6. November es Baugsuech uf. D Zuefahrt sell aber vo de Tägerhardstrass bzw. de Untere Geisswiisstrass her erfolge. Au Parkplätz sind dete vorgseh, allerdings empfehled Betriiber, wi au schon i dem Johr, mit em ÖV oder Velo aazreise.