Am Sunntig gilts ernscht!

Am Sunntig, 26. November 2017 isch Abstimmigssunntig. Z Wettige isch de 2. Wahlgang vom Vizeamme und d Abstimmig über Voraaschalg und Stüürfuess.

Im Vorfäld het vor allem d Stüürfuesserhöchig z rede geh. Wil s Volk im Februar 2017 de Entflechtig vo de Finanziirig und Ufgabe zwüsche Gmeinde und Kanton aagnoh het, entspricht de gliichblibend Stüürfuess ere Stüürerhöchig. Da drum hets in de letschte Woche grossi Diskussione geh, wil im Aatrag an d Stimmbürger vomene “gliichblibende” Stüürfuess z läse isch. De Thomas Bodmer, Alt-Iiwohnerrat und Alt-Grossrat vo de SVP het sogar e Stimmrechtsbeschwerde bim Kanton iigreicht.

Aber au e Wahl finded statt, denn bi d Gmeindratswahle vom 24. September 2017 het keine vo de drü offizielle Kandidate s absoluti Mehr chönne erreiche. All drü treted im 2. Wahlgang wider aa und dismol langed s eifachi Mehr. D Wahl wird spannend, sind doch im 1. Wahlgang de Markus Maibach (SP, 1’554 Stimme) und de Martin Egloff (FDP, 1’454 Stimme) exakt 100 Stimme usenand gläge und au de Philippe Rey (920 Stimme) kandidiirt wider.

Wer au immer oier Favorit isch und wi ihr zum Budget stönd: Gönd go stimme und wähle!

Advertisements