D Friidhofschile uf de Brunnewise isch en wichtiger Ort. Dete nehmed vili Familie, Fründe und Kollege Abschiid vo ihre Verstorbene. D Akustik macht aber sit Jahr Probläm. Das sell sich ändere.
S isch e kniffligi Ufgab, wo sich de Gmeind in de Friidhofschile Brunnewise stellt. D Akustik isch dete suboptimal und sell verbessered werde. Entscheidend für e guti Akustik isch di sognannti Nachhallziit, wo aber – je nach Nutzig – unterschidlichi Aaforderige het. So empfiihlt di Eidgnössisch Material- und Forschigsaastalt (EMPA) bimene Ruum mit 5000 qm e Nachhallziit vo 1.2 Sekunde für Sprach, 1.7 für sinfonischi Musik und 2-3 für sakrali und Orgelmusik. Allei scho für d Nutzig durch Abdankigsgottesdienscht, bi dene d Sprach und d Orgelmusik wichtig sind, zeiged es Dilema uf, wo nöd würkli lösbar isch. Au d Aazahl Lüt, wo bi ere Abdankig aawesend sind, hend e grossi Uswirkig uf d Nachhallziite.
Unabhängig davo hend aber Messige, wo d Firma Akustik+Bauphysik GmbH im Uftrag vo de Gmeind im Mai 2016 erfolgd sind, e Nachhallziit vo 4.39 Sekunde ergeh, was uf jede Fall vil z vil isch. S Ziil, so het ois d Kirsten Ernst, Gmeindrötin mit de Ressort Tiefbau und Umwält, ois mitteild, sig 1.2-1.6 Sekunde. Damit isch s Ziil vo de Gmeind klar definiirt, was d Pfärrer, d Pastoralassistente und Beerdigungsredner säged, muess chönne verstande werde.
Di beuftraiti Firma het de Gmeind zwei Massnahme zur Verbesserig vo de Akustik vorgschlage: Polsteruflage uf de Stüehl, wo d Nachhallziit uf 2.75 Sekunde selle senke und zusätzlichi Akustiksegel a de Decki, wo kombiniirt mit de Polsteruflage e Nachhallziit vo 1.49 Sekunde sette ergeh.
Um z luege, ob di Verbesserige iiträted, hend vorderhand d Hälfti vo de Stühel in de Friidhofschile Polsteruflage übercho, wo en bsetzte Sitzplatz selle simuliire. Guet wär deshalb, wenn d Teilnehmerinne und Teilnehmer vo Abdankigsfiire uf d Stüehl ohni Polster würded sitze.
Wettiger Nochrichte 