Zwei Wettiger sind uf grosser Fahrt

“Hallo Abenteuer”, das send zwoi vo Wettige, wo uf grosser Fahrt gange send.

Am 31. Oktober 2017 händ d Debbi und de Dominic mit em Fredy (en Mercedes 310D 4×4, Jahrgang 1992) und de Emy (en Weltebummlerhund, Jahrgang 2005) sech ufgmacht uf die grossi Fahrt.

Als erstes Ziel send Sie Rechtig Frankriich losgfahre. …gmäss Ussage vo dene Zwoine, möchtet sie d Wiehnachte ufeme andere Kontinet verbringe…uf em afrikanische, z Marokko. Im noie Johr möchtet Sie denn weder rechtig Norde fahre.

Bevor Sie jedoch uf die Reiss send, händ Sie s‘Equipment uf ere andere Reise testet. Sie und vier Fründe, de Dani mit de Sabrina im grüene Landrover, de Marco und de Aebi im wysse Landrover, send vom 24. Auguscht bis am 24. September uf Island gange. Med de Fahrzüg zerscht uf Dänemark, denn für drü Täg mit de Fähri via Färöer uf Island. Aaschliessend esch de Trupp denn rechtig Hochland los wo Sie so einiges erläbt händ. Zum Biispiel hed mer isländische Schof-Hirte med de Drohne g‘holfe bem “Réttir” em Schofabtriib in Island nach verlohrene Schof z‘sueche, hed diverse Touriste wie au Isländer gholfe be chlinere und grössere Reparature. Sie händ flissig Ihres Material testet, bem Befahre vo de Hochlandpiste und bem Zubereite vo de Mahlziite. I dere Ziit, wo Sie uf Island gsi send, send sie rund um und quer düber die Insle cho. Das ganze be klassischen Island-Wetter wo vo Nebel, wolkelos, Sonneschii, Rege, Sturm, warm und chalt…eifach vo allem gha hed. Schlussendlich esch es denn weder med de Fähri, während drei Täg, zurgg via Färöer uf Dänemark gange und denn via Autobahn id Schwiiz zrugg.

Be dem Test hed mer doch so s‘einte und andere use g‘funde, wo mer no hed chönne optimiere am Fredy und am Material. Drum esch de Bus denn nomol guet en Monet z Wettige und i de Region umgestande, bes es äntli het chönne losgoh.

Nach de letschte Informatione esch es via Camargue Rechtig Spanie gange. Zur Ziit verwiiled Sie i de Region um Malaga wo Sie de Fredy und s Material weder uf Vordermaa bringed.

Wenn Euch das gluschtig macht, hend Debbi und de Dominic e Homepge, eigentlich e Blogsiite wo Sie flissig med neuem Videomaterial bestückted….mit sogenannte VLOG’s.

https://www.halloabenteuer.com/

Mer vo de Wettiger Nochrichte wünsched dem Team veel g‘freuts und möglichscht wenig Pannene, guets Wetter und veele gueti Begegnige mit guete Lütt vo nah und fern.

Advertisements