D AFM Futsal Maniacs hend wider de Aaschluss gfunde

D Saison het für d Futsal Maniacs nöd eso guet aagfange. Nach vilne Rückschläg isch es in de letschte Match berguf gange!
D Erwartige sind bim Schwiizermeischter vo 2016 natürli höch, bi de Mannschaft und bi de Fans. Nachdem de Start in d Saison 2017/18 nöd so guet gloffe isch, hend d Maniacs in de Premiere League di letschte viir Match gunne und sind uf Platz 5 mit Aaschluss an d Playoff-Plätz.
Bi de letschte beide Heimmatch hend mir vo de Wettiger Nochrichte dörfe derbi si und hend tolli Match erläbt. Gege R.C.D. Fidell Futsall hend am 25. November 2017 zum Schluss d Maniacs mit 10:7 d Nase vorne gha. De Match isch uuh spannend gsi und erscht in de letschte zwoi Minute entschide worde.
Hüt, 9. Dezember 2018 sind d Old Sox us Fribourg d Gegner im Tägi gsi. Au der Match isch lang usgliche gsi. Nach em 1:0 in de 3. Minute durch de Alessandro Facchinetti isch in de 5. Minute de Usgliich zum 1:1 gfalle. Scho drü Minute spöter het es 2:1 gheisse und d Maniacs hend de Vorspung bis öppe drü Minute vor de Pause chönne hebe. Mit eme 2:2 isch es dann in d Kabine gange. In de 27. Minute isch dann s 3:2 für d Maniacs gfalle und wo d Fryburger e paar Minute vor Ändi vom Match de Goali als Feldspiler iigsetzt hend, isch s 4:2 gfalle (37. Minute) und einehalb Minute vor em Schlusspfiff isch mit em 5:2 dann alles klar gsi.
Mir wünsched de Maniacs gueti Erholig über d Fäschttäg und drucked Duume für de nächschti Match, wo am Sunntig, 7. Januar 2018 wird stattfinde.

Hiit e paar Impressione vom Match gege d Fribourg Old Sox:

Advertisements