S kantonali Departement Finanzen und Ressourcen het Aafangs Dezember e Statistik zu de Sozialhilfeempfänger im Kanton veröffentlicht. Wettige het di dritthöchschti Quote im Bezirk Bade.
Je grösser e Gmeind, desto grösser d Sozialhilfequote, so chönnd me d Ergäbnis vo de Statistik zämmefasse. Jedefalls isch d Quote für Persone, wo vo de Sozialhilfe unterstützt werded, in Gmeinde mit meh wi 20’000 Iiwohner bi 3.3% und damit höcher wi in allne andere Gruppe. Aazmerke isch aber, dass numme Aarau und Wettige in di Kategorii ghöred und damit nöd eso ussagekräftig isch. D Quote nimmt je nach Gmeindegröss stetig ab, so dass di Gmeinde mit weniger wi 1’000 Iiwohner uf en durchschnittliche Wert vo 1.2% chömmed.
Im Detail gits aber dütlichi Abwichige vo dene Zahle, so het d Gmeind Schpreitebach e Quote vo 5.4% und Turgi vo 4.1%. Damit ligd Wettige im Bezirk numme uf em dritte Platz mit 3.2%. In absolute Zahle sind es 432 Dossiers mit 657 betroffene Persone, wo vo de Soziale Dienscht vo de Gmeind betroit werde.
S Badener Tagblatt het versuecht d Gründ für di Unterschiid usezfinde. De Artikel finded ihr hiir.