Wo endet d Leinepflicht? – Teil 2

Hiir chunnt d Fortsetzig vo oisere “Vor-Ort-Recherche” zu de Gränze vom Sidligsgebiet, wo d Leinepflicht für alli Hünd söll iigführt werde. (HIir gohts zum Teil 1)

 Hinterm Tägi im Forhölzli isch d Gränze, we me vom EW her Richtig Würelos und Autobahnbrugg laufd, noch em Wäldli, kurz vor em Schopf uf de rächte Site (linki Foti). D Hünd dörfe ab da rächts vo de Iisebahn öberall ohni Leini laufe. Richtig Tägi ghörd d Brugg über d Schiine nöd zum Sidligsgebiet, aber de Parkplatz vom Tägi scho und au de Wäg ab em Fuess vo de Brugg. S Fäld Richtig Würelos ghörd widerum nöd zum Sidligsgebiet. D Gränze laufd dann gradus über d Stroos und witer entlang em Wäg Richtig Unteri Geisswiis, wobi uf em Wäg Leinepflicht isch, rächts danebe nöd.


Au oberhalb vo de Limmig entlang vo de Schwimmbadstroos laufd d Gränze zwüschem Sidligsgebiet und “de Natur” entlang vo de Stroos bzw. em Fuess- und Velowäg. Unterhalb vom Wäg, also bim Wägli zu de Drüeckstei vom Kulturwäg Limmig, Richtig Pischtoleschiisstand und uf de Stäge zum Juliloch gilt d Leinepflicht nöd. Nach de Karte, wo uf de Kanzleo ufligt, gilt si interessanterwiis au nöd uf em noie Velowäg vo de Iisebahnbrugg, aber uf de Zugäng zu de Brugg scho.


Am Lägerehang gilt vom Schartefels her d Schartefelsstroos als Teil vom Sidligsgebiet, d Hüüser oberhalb vo de Stroos aber nöd (d Hüüser unterhalb liged uf em Gmeindsbann vo Bade).  D Gränze laufd dann entlang vo de Rebbergstroos bis zum Parkplatz und im witere Verlauf isch d Vordere Höhestroos d Gränze. Uf de Mooshaldestroos herrscht dann bis zum Fähli-Lee kei Leinepflicht und au am Grüeziwäg nod, ausser von 1. April bis zum 31. Juli, wenn im Wald und am Waldrand e allgemeini Leinepflicht gilt.

Advertisements