De Iiwohnerrot het d Rächtsformänderig vom EW gnehmiged

In de Sitzig vom Donnschtig, 17. März 2016 het de Iiwohnerrot de Umwandlig vom EW in en AG zugstimmt. Au anderi Wirtschaftstheme sind wichtig gsi.

Nach de Inpflichtnahm vom neue EVP-Einwohnerrot Lutz Fischer-Lamprecht het de Präsident Paul Koller de Dieter Minder für sini langjährigi Arbet in de Brichterstattig für s Badener Tagblatt über Wettige danked und ihm s Verspreche abgnoh, au nach sinere Pensioniirig zumindescht einisch im Johr im Rot vorbizluege. Dadefür wird er im Aaschluss vo de jewilige Sitzig vom amtiirende Rotspräsident uf en Umtrunk iiglade.
Danach isch es mit de Wahl vo de Nochfolg vo de Helen Suter in de Gschäftsprüefigskommission witergange. D Fraktion EVP/Forum 5430 het de noi Iiwohnerrot Lutz Fischer-Lamprecht vorgschlage und er isch mit 32 vo 38 gültige Stimme gwählt worde.

Im Aaschluss isch das Thema dra gsi, wege dem vermutlich di meischte vo de zahlriiche Gäscht uf de Tribüne cho sind: D Rächtsformänderig vom Elektrizitäts- und Wasserwerk Wettige. Wil d Kristin Lamprecht für d Fraktion SP/WettiGrüen en Nichtiiträtensaatrag gstellt het, isch zunächscht en Iiträtensdebatte gführt worde. D Abstimmig isch dann eidütig gsi: D Fraktion SP/WettiGrüen het fascht gschlosse fürs Nicht-Iiträte gstimmt, di andere degäge. In de Diskussion sind verschidnigi Aaträg vo de Finanzkommission (Fiko) abgsimmt und meischt eistimmig aagnoh worde. Danach het de Iiwohnerrot über di einzelne Aaträg vom Gmeindrot abgstimmt. Die meischte sind bi 32 Ja-Stimme, 10 Nei-Stimme und einere Enthaltig aagnoh worde. Bi de Schlussabstimmig sind es dann 2 Enthaltige gsi bi 32 Ja- und 9 Nei-Stimme für d Änderig vo de Rechtsform gsi und de Bschluss über es obligatorischste Referendum isch eistimmig gfassed worde. So wird s Stimmvolk s letschti Wort über d Rächtsformänderig vom EWW ha.

 

En Kredit für e Kanalsaniirig im Gebiet nördlich vo de Landstroos isch eistimmig aagnoh worde. D Motion vom Alain Burger (SP) und em Philipp Bürgler (FDP) für d Iiführig vo de Wirkigsorientiirte Verwaltigsführig (WoV) het de Gmeindrot numme als Poschtulat welle entgegeneh. Wil d Motionär mit de Überwisig als Poschtulat iiverstande gsi sind, het es kei Abstimmig geh. S Poschtulat vom Daniel Notter (SVP), Christian Pauli (FDP) und em Roland Michel (CVP) für e stärcheri Beachtig für s Gwerb und d Arbeitsplätz z Wettige isch vom Gmeindrot entgege gnoh und abgschribe worde. D Poschtulante sind aber nöd ganz zfride gsi, wil d Absicht vom Gmeindrot, wi er konkret Gwerb und Arbetsplätz wot fördere, in de schriftliche Antwort nöd klar worden isch. D Erlüterige vom Gmeindsammaa Markus Dieth hei d Poschtulante dazu brocht, mit de Entgegenahm und de Abschriibig iiverstande z si, aber d Marie Louise Reinert (EVP) het de Aatrag gstellt, das Poschtulat no nöd abzschriibe. D Erklärig vom Gmeindsamaa, dass s Aalige es Duuraalige vom Gmeindrot sig und deshalb en Abschriibig nüd dät ändere, het di meischte Rotsmitgliider überzügd. Als vorletschts Traktandum isch s Poschtulat vom Daniel Notter und em Jürg Baumann (beidi SVP) zu meh Gwerb und Dienschtleischtigsfläche z Wettige traktandiirt gsi. D Poschtulante hei d Entgegenahm durch de Gmeindrot begrüesst, sind aber mit de Abschriibig nöd iiverstande gsi. Au hiir het de Markus Dieth druf higwisse, dass es hiir um e Duurufgab gängdi und en Abschriibig nüd dät ändere. Bi de aaschliissende Abstimmig über d Abschriibig sind 9 Iiwohnerröt im Gmeindrot gfolged und 27 sind gäge en Abschriibig gsi.

Unter Verschiedenem het de Iiwohnerrotspräsident di noi iigreichte Motione, Poschtulat und Interpellatione verlese und s 50-jährig Jubiläum vom Iiwohnerrot, wo bim Wettiger Fäscht söll gfiired werde, isch au Thema gsi. Au s Schwiizer Gartejohr isch vorgstellt worde und um 21:57 Uhr het de Präsident d Sitzig gschlosse.