Spare, spare, spare!

Wi meischt in de letschte Johr, het d Thema Spare d Iiwohnerotssitzig vom Donnschtig, 23. Juni 2016 dominiirt. Und das obwohl kein Aatrag uf en Kredit für irgend es Projäkt vorgläge isch.

Gmeindrötin Antoinnette Eckert und Iiwohnerrot Michael Merkli am Rednerpult (Foti: Roli Michel)

D Anahm vo de Johresrechnig und em Recheschaftsbricht 2015 sind di wichtigschte Traktande vo de Iiwohnerrotssitzig vom letschte Donnschtig gsi. Au wenn beidi Gschäft unbestritte gsi sind, hend d Fraktione d Glägeheit gnützt, um ihri finanzpolitische Positione darzlege. Di Rächte wend witer spare, di Linke sind de Meinig, dass s Verschiebe vo Investitione kei Lösig sig  und d Fraktion EVP/Forum 5430 het druf higwisse, dass au d Iinahmesite müesst emol aaglueged werde.

Kurz und heftig isch es bin Zwischebricht zu de LOVA 2 zu- und hergange. De Bricht isch numme zur Kenntnis gsi, aber d Fraktion SP/WettiGrüen het mit eme Aatrag di ganz Üebig welle abbreche. Das het CVP in Rage versetzt, so dass de Fraktionspräsident vo de CVP, de Jürg Rüfenacht de SP ideologischi Verblendig vorgeworfe het. Dass d Fraktion eifach es legitims demokratischs Mittel iigsetzd hed, isch für d CVP nöd iisichtig gsi, obwohl de Aatrag zu dem Zitpunkt scho mit 9 Ja und 36 Nei-Stimme abglehnt gsi isch. D Sorg, dass z vili Leischtige, wo wichtig aber nöd gesetzlich vorgschribe sind, em Spare chönnte zum Opfer falle, hend di Linke chönne deponiire, was bi de klare Dominanz vo de Bürgerliche im Rot nöd unbegründet isch.

Für grosses Kopfschüttele im Rot het es Votum vom Michael Merkli gsorged, wil er in de Finanzdebatte gsait het, Wettige hetti Glück gha, wil im 2015 di richtige Lüt gstorbe siged. D Erbschaftsstüür het sich so positiv  uf de Jahresabschluss usgwirkt.

Uf jede Fall isch im Herbscht e kontroversi Budgetdebatte z erwarte.

Advertisements