Verärgerti Bsuecher im Tägi

Im Tägi langed de gross Parkplatz nöd immer für alli Gäscht. Es Uswiiche in di blau Zone a de Tägerhardschtroos cha aber zu unliibsame Überraschige führe. Zum Bischpil geschter, Donnschtig, 4. Juli 2016.

2016-08-04 17.10.09Es isch en warmer Tag gsi geschter, d Chind hend no Schuelferie und so hets di ei oder ander Familie in d Badi im Tägi zoge. De Parkplatz isch schnell volle gsi und so hend vili Bsuecherinne und Bsuecher s Auto in de blaue Zone a de Tägerhardschtroos parkiirt. S Schild, dass s Parkiire am Mittwochnamittag und am Samschtig und Sunntig unbegrenzt sig, hend vili als Zeiche dütet, dass s Parkiire dete für di tradtionell schuelfreie Ziite dät gälte. Us rächtlicher Sicht isch d Lag eidütig: Donnschtig isch ebe nöd Mittwoch und so het Regionalpolizei Buesse verteilt. Jewils 40.- Franke sölled Automobilischte zahle, wo d Parkzit von ere Stund (bzw. bis zu 1 1/2) überschritte hend. Gross isch de Ärger und s Unverständnis gsi, wo d Lüt bim retour cho us de Badi d Buesse unter em Schiibewischer gfunde hend.«Mir gönd nie meh ins Tägi go schwümme» , isch vo Uswärtige z ghöre gsi. Nöd alli Wort, wo dete gfalle sind, sind zitiirfähig.

Warum d Polizei a dem warme Sommertag nöd het chönne grosszügig si? Mir hend de RePol-Chef aagfröged und er het ois e ganzi Reihe vo Imformatione und Gründ gnennt:

  • es het bim Tägi 300 Parkplätz, wo em Tägi ghöred und koschtelos sind
  • d Gmeind stellt zusätzlichi e grossi Zahl Parkplätz i de blaue Zone ebefalls koschtelos zur Verfüegig
  • e Sonderregelig erlichtered s Parkiire am Mittwochnamittag und am Samschtig, aber ebe numme a denne Täg
  • zusätzlich isch es möglich im Gmeindsbüro im Rothuus für 10.- Franke e Tagescharte z löse oder mit em ÖV z cho
  • d Verantwortig vo de Iihaltig vo de gsetzliche Bstimmige ligd grundsätzlich bin Fahrzüglenker
  • vili hend nöd emol d Parkschiibe hinter d Windschutzschiibe glägd gha
  • d Polizei isch dafür verantwortlich, dass es bim Parkiire kein Wildwuchs git 
  • Usnahme sind scho deshalb nöd möglich, wil e Nichtiihaltig vo Vorschrifte au Beschwerde vo Bürger zur Folg hend
  • Usnahme däte Präjudizie schaffe, wo dann au von andere däte iigforderet werde und e Parkruumkontrolle wär in de Folg nümm möglich

 

Advertisements