Wegem Rücktritt vo de Yvonne Feri (SP) us em Gmeindrot gits z Wettige am 25. September 2016 en Ersatzwahl. Offiziell nominiirt worde sind vo de SP d Kirsten Ernst und zusätzlich vo de SVP de Franz-Beat Schwere. De Vorstand vo de EVP empfihlt d Kirsten Ernst z wähle.
Mit ere Mediemitteilig informiirt de Vorstand vo de EVP Wettige-Limmigtal drüber, dass er di beide Kandidate zu trennte Gschpröch iiglade gha het. Di beide Kandidiirende hend sich de Froge bi de EVP gstellt und so isch intensiv diskutiirt und politisiirt worde.
D Entscheidig, d Kirsten Ernst z unterschtütze, isch us zwei Gründe gfällt worde: D Kirsten Ernst stoht mit ihre Visione de politische Ziil vo de EVP nöch, so isch de Mitteilig z entneh. Ihri Schwerpünkt liged bi de Familiepolitik, ere qualitativ höchstehende Bildig für d Wettiger Schüeler, em guete Mitenand vo de Generatione und ere usgwogene Finanzpolitik, alles Themene, wo de EVP-Fraktionsmitglider im Iiwohnerrot, em Vorstand und derRegionalpartei ebefalls wichtig sind.
Zudem isch es de EVP als Partei vo de Mitti es Aalige, dass d Zämmesetzung vom Gmeindrot usglichen isch und di politische Lager guet iibunde sind. Bi ere Verschibig vomene SP-Sitz hin ins rächte bürgerlich Lager wär di Usglicheheit no me gfährdet, wi si es sit de letschte Wahle scho isch.
De Franz-Beat Schwere chönnt de Vorstand vo de EVP als unterstützigswürdige Kandidate dann vorschtelle, wenns um en bürgerliche Gemeinderotssitz ging.
Wettiger Nochrichte 