S Plakatiire für d Grossrotswahle het scho aagfange

D Regelig vom Kanton in Bezug ufs Plakatiire vo de Grossratswahle isch eidütig: Im öffentliche Ruum dörfe d Partei und Kandidate ihri Plakat acht Woche vor de Wahl ufstelle. Nach Uskunft vom Gmeindsschriiber Urs Blickenstorfer gilt das ab em Mentig, 29. Auguscht 2016. Aber nöd alli halted sich dra!

GR-Plakate SVP 160826

D SVP het drü Tag vor em erlaubte Termin scho Plakat ufgschtellt. (Foti: zVg)

Scho vor nün Täg hend mir d Frog ufgworfe, ob d Plakat vo de Grüene legal siged, wo zwar für d Initiative für e Grüeni Wirtschaft (Abstimmig am 25.September 2016) gworbe hend, aber au für ihre Regiirigsrotskandidat (Wahl am 23. Oktober 2016). Di Frog het Welle bis ins Badener TagblattWelle bis ins Badener Tagblatt gworfe. In de Zwischeziit schiinet d «Buebetrickli» au bi andere Parteie Fuess z fasse. D BDP hat für ihre Kandidat fürs Bezirksgricht Jean-Pierre Leutwyler (Ex-GLP) scho z Wettige plakatiirt. Das isch zwar insofern legal, als er einer vo 13 Kandidate für 12 Sitz isch und d Wahle am 25. September stattfinded. Anderersits isch es verwunderlich, dass d Plakat erscht vor oppe ere Woche uftaucht sind und so wi si usgsehnd, für d Grossrotswahl eifach chönnd hange böiibe. Unter de Chlebstreife, wo zu Teil scho appelamped, isch vermuetlich Wahlerbig für d Grossrotswahle, wo de Leutwyler uf em sächste Lischteplatz vo sinere Partei stoht.
Ganz sicher gege d Regle vom Kanton verstosst aber d SVP. Mir sind druf ufmerksam gmached worde, dass hüt gege di drü am Namittag en ältere Maa uf de für Wahlwerbig sehr beliebte Wise mit de «Haifischzäh» bim Chloschter e ganzi Reihe Plakat ufgschtellt het. D Konkurrenz um di beschte Schtandplätz uf öffentlichem Grund schint sich z Wettige langsam aber sicher zu eme unschöne, wil unfaire Wettbewerb z entwickle. De Kürzere ziehed dann di Partei, wo sich an d Regelige halte.

Advertisements