D Gmeind het hüt bi ere Mediekonferenz de Schlussbricht vo de Leischtigsorientiirte Verwaltigsanalyse (LOVA 2) präsentiirt. D Iiparige solle helfe, de Stüürfuess stabil z halte. Au e Verchlinerig vom Gmeindrat isch im Gschpröch.
Mit eme 39-sitige Abschlussbricht zeigt d LOVA-Projektgruppe uf, wo Verwaltigsabläuf in de Gmeind in Zuekunft chönnt optimiirt weerde, und wo au personelli Abstrich möglich schiined. Bsunder eis vo de Themene het s Potential zu ere grössere politische Usenandersetzig: De Vorschlag, de Gmeindrot vo sibe uf füf Mitglieder z verchliinere und allefalls es Gschäftsleitigsmodell iizführe, bi dem de Gmeindrot numme no strategischi Entscheid würd träffe. Wi zum Bischpil inere AG, wo zwüsche de strategische Entscheid, wo bim Verwaltigsat aagsidlet sind und em operative Gschäft, för das d Gschäftsleitig zuständig isch, währe dann d Zueständigkeite klar trännt. Aber isch e Gmeind wi e Firma z organisiire? Und isch en personelle Abbau im Gmeindrot sinnvoll, wo für di andere föif en höchere Ufwand bedütet und damit em Milizsyschtem entgeglaufd. D Diskussion da drüber dörfd abwechsligsriich werde.
Wettiger Nochrichte 