Am Donnschtig, 20. Oktober 2016 wird s Budget 2017 im Iiwohnerrot behandlet. D Diskussion um de Stüürfuess wird kontrovers verlaufe.
D Gmeindrat legt em Iiwohnerrat es usglichnigs Budget vor, gliichwohl isch en Erhöchig vom Stüürfuess, wo im Momänt bi 95% ligt, in de Diskussion. Grund dafür isch, dass s Budget numme durch d Iinahme vomene Landverchauf in Höchi vo 1.8 Millione Franke und mit 1.4 Miliione Franke us de Ufwertigsreserve cha usgliche werde. D Fraktion SP/WettiGrüen het scho de Widerstand gege s Budget aakünd, wird en Aatrag uf Erhöchig vom Stüürfuess uf 100% stelle und s vorligende Budget ablehne. Alli andere Fraktion signalisiired in ihrne Fraktionsbricht e Zuestimmig zum Budget, zum Teil aber mit kritische Aamerkige zum legale Finanztrick. So meint d Fraktion EVP/Forum 5430, es sig nöd «weise», durch en Landverchauf und d Verschibig vo werterhaltende Investitione s Resultat z schöne und glp schribt vo «Finanzgymnastik». Gliichwohl werded beidi Fraktione, wi au d BDP em Budget zuestimme.
Bi de Bürgerlichen gründet d Ablehnig vonere Stüürfuesserhöchig vor allem da druf, dass si für die künftige Budget witeri Iisparige durch d LOVA 2 erwarted, so dass langfrischtig es Budget ohni settigi Sondereffekt z erwarte sig. D Fraktion FDP betont, dass si sich Dank LOVA 2 es usglichnigs Budget ohni Sondereffekt erwartet hätti und d SVP betont, dass es in de nächschte Johr grossi Disziplin brüüchi, um de Stüürfuess vo 95% z halte. Vo de CVP ligt de Fraktionsbricht no nöd vor.
Wettiger Nochrichte 