De Iiwohnerrat laht de Gmeindamma im Räge stoh

Im Iiwohnerrat Wettige isch geschter s Budget für 2017 verabschiidet worde. De Rat het einigi heftigi Iischnitt vorgnoh, wo ihm selber aber nöd weh düend.

 

img_7974Teilwis isch es bi de Budgetdebatte vom 20. Oktober 2016 sehr emotional zue und her gange. De Rat het  aber weder für d Warnig, noch für Bitte es Ohr gha.
Aber fanged mit em Bricht über d Budgetdebatte vorne aa. D Finanzkommission (Fiko) het Strichigsaaträge über insgsamt 571’300.- Franke gstellt, obwohl s vorliigendi Budget usgliche gsi isch. Will s Budget aber numme ufgrund vo Sondereffekt het chönne usgliche werde, nämlich durch en Landverchauf und en Entnahm us de Ufwertigsreserve, isch d Fiko mit em Budget nöd z fride gsi. Fascht alli Fraktione hend de Usgliich durch d Sondereffekt kritisiirt und d Fraktion SP/WettiGrüen het en Aatrag uf Rückwisig vom Budget gstellt und für d Novembersitzig vom Gmeindrat en neue Voraaschlag mit eme Stüürfuess vo 100%, statt de aktuelle 95% beaatrait. Der Aatrag isch aber mit 34 zu 12 Stimme abglehnt worde.
Insgsamt het d Fiko 22 Änderigsaaträg gstellt, vo dene e ganzi Reihe unbestritte gsi isch. Bi andere isch aber Kritik lut worde, bsunders vo de Ratslinke. So hent di bürgerlich Ratsmehrheit, gege einigi engagierte Vote unter anderem au eis vo de Sozialvorsteherin Yvonne Feri,  d Strichig vo de situationsbedingte Leischtige i de Sozialhilf bschlosse. Wo genau di Koschte sölle iigspart werde, dazu het sich Fiko aber nöd güsseret. Für Emotione het au d Ussag vom Fiko-Präsident Christian Wassmer (CVP) gführt, wenn me nöd bi de Sozialhilf gschpart het, het me das bi de Bildig müesse mache.
Au d Striichig für d Uslandshilf, wo bisher bsunders für d Bewältigung vo Katastrophe bruuchd worden isch, het de Rat vo 30’000.- Franke du null kürzt. Au da het di lapidar Begründig vom Fiko-Präsident, es wüssi ja jede, wo d Kontonummer vo de Glücksketti z finde sig, um selber öppis z spende, uf de linke Site vom Ratssaal für Unmut gsorged.
D Kürzige sind vo de SVP, de FDP, de CVP meischt gschlosse befürwortet worde, d Mitteparteie BDP, GLP und EVP/Forum 5430 und d Fraktion SP/WettiGüen hend je nach Aatrag unterschidlich abgschtumme und d Miiti hüfiger au nöd fraktionswis.
Im Räge stah lah het de Iiwohnerrat au de Gmeindamma Markus Dieth. Sis flammende Plädoyer für d Bibhaltig vom Budgetposchte für d Standortförderig, wo d Fiko im 131’000.- Franke het welle kürze, isch uf taubi Ohre gstosse.

De Rat het letzschtendlich alli Kürzigsaaträg vo de Fiko aagnoh, was nebe de SP und de Grüene au EVP veraalasst het, gschlosse gege s Budget 2017 z stimme. Mit de Stimme vo de CVP, de SVP, de FDP, de BDP, de GLP und em Forum 5430 isch s Budget letschtendlich mit 33 Ja zu 13 Nei aagnoh worde.

Advertisements