Wer wird Nachfolger vom Markus Dieth?

Am Sunntig, 23. Oktober 2016 isch bald klar gsi, dass es so chunnt, wi di meischte vermuetet hend: Wettige bruuchd en noie Amma und en noie Gmeindrat.

Uf Ends Jahr wird de Markus Dieth us em Gmeindrat zruckträte um sis Amt als Regiirigsrat z überneh. Dadermit bruuchd d Iiwohnergmeind en noie Gmeindrat.

Wahltermin isch Sunntig, 18. Dezember 2016. Bis jetzt schint numme klar, wen d CVP wird ins Renne schicke, isch es ja au en bisherige CVP-Sitz, wo d Partei sicher in de eigede Reihe wot bhalte. D Parteiversammlig wird zwar erscht am 2. November drüber abstimme, wen si ins Renne wot schicke. Aber us de bisherige Üsserrige in Interviews isch d Sach klar: Für de Gmeindrat wird de Präsident vo de CVP-Ortspartei, de Roli Michel kandidiire und als Gmeindamma de CVP-Gmeindrat Roli Kuster.

Ois Aafrag bi de Wettiger Ortsparteie laufd no, aber d SP het scho abgwunke: si siged mit ihre zwei Vertreter im Gmeindrat vollständig vertrete, so de SP-Präsident Christian Oberholzer und e Kandidatur als Gmeindsamma chunnt für de SP-Gmeindrat Markus Maibach us bruefliche Gründ nöd in Frag. Au de EVP-Präsident Lutz Fischer-Lamprecht het scho Stellig gnoh. D Partei sig am Abkläre, wi si sich bi de Gsamterernoierigswahle im Herbscht 2017 wird positioniire, aber für 2016 sig kei Kandidatur planed. Au scho gantwortet het de Präsident vom Forum 5430. E Kandidatur für de Gmeindsamma het er usgschlosse. Obs Forum aber in de Gmeindratswahlkampf iistigt, sig no nöd entschide.

Advertisements