S Feschtzält vo de ABB wird wider abbaut

So grosse Jubiläum isch vorbi, s Zält uf de Zirkzswise bald verschunde. Hend ihr oich au scho gfröged, was genau eigentlich da dinne los gsi isch? En ABBlerin, bi dere me s Härzbluet für ihri Firma gschpührt, het ois Uskunft geh und mir veröffentliche ihre Tekscht gärn genau so, wi si ihn ois gschickt het:

125 Johr BBC/ABB Schwiiz

Ich han kei Ahnig, wie nöd ABBler d’ABB wahrnähmed. För mich isch die Firma i de Freiziit nöd würkli existent. Bis uf das Jahr! Unglaublich ÜBERALL ABB: Solar Impulse, Gotthard, RVBW Bus, Plakät im TV, uf de Strosse i de Ziitige und so wiiter, und so wiite. Ich gibbe zue, dass ich mich einigi Male debii ertappt han, wo ich mich gfröged han, ob die farbige / ganzsiitige Inserat i de Ziitige händ müässe sii und wie tüür wohl die Busbeschriftig gsii isch. Schliesslich bechumme ich, wie viili anderi au, jedes Johr z’ghöre, dass es nöd langed för e Lohnerhöhig.

Und jetzt händs no Geburtstag… Es total überdimensionierts Zelt über Woche und de Lärm uf de Zirkuswiese in Wettige! Ja, ich han de Lärm au sehr guet ghört und ich han au müässe i de Nächt mis Schlofzimmerfäister zuemache. Aber hey, liebi Wettiger/inne, de Johann Schneider-Ammann weiss jetzt wo’s grösste Dorf vo de Schwiiz isch! Und was no viil interessanter isch, euse CEO hät sin neue Schwiizerpass frei Huus gliifered becho. Ja, da chamer echt niidisch wärde, oder?. Wär de Pass vom Adrian Amstutz überreicht worde, wär’s öppis anders gsii! Nöd wäg de Partei, es paar Fraue werdet sicher verstah, was ich meine…

Wenn mer sich die Ziit nimmt, d’Gschicht vo BBC/ABB und vom Standort richtig aluegt denn chönnted mer eigentlich sehr, sehr stolz sii. Bade isch s’Silocon Valey gsii Ändi 19. Afang 20. Jahrhundert! Alli vo eus händ en Erinnerig ad BBC. Au wenn’s nur e Dunstabzughuube i de Chochi gsii isch! Mer alli händ Erfindige vo BBC/ABB diheime. Zum Biispiil d’LCD Azeig! Fiebermässer, Uhre etc… Ja, das hät BBC erfunde. UND Bade isch die erst Stadt in Europa(!!!!!) gsii, wo elektrisch belüchtet gsii isch.

Jetzt aber fertig mit harte Fakte! Au ich als ABB Schwiiz Mitarbeiterin bin a das Fäst i dene riiiissige Zelt iiglade gsii. Letschte Samstig isch es so wiit gsi. Es isch wörkli gigantisch, was sie ufgstellt händ. Bitte fröged mich nöd, wie tüür das ganze gsii isch, ich weiss es nöd und um ehrlich z’sii, wott ich’s gar nöd wüsse. Bim innecho sind mer vom YUMI begrüässt worde. Die neusti und im Moment stolzesti Errungeschaft vo de ABB. I de flache riesige Halle häts en Stehapéro mit Häppli gäh und spöter sind eus warmi Spiise i chliine Schüsseli, Kaffii und Dessert serviert worde. I de Halle mit de Kupple isch denn de Showteil gsii. Viil Werbig und selbstbeweihräucherig. Aber hey! Wieso nöd? Nur will mer Schwiizer bescheide sind? Bim Mitarbeiterfäst häts kei Prominänz gha. Nöd so, wie bi de Politiker, Chunde und Wirschaftsführer. Aber schlussändlich isch das nöd nötig, denn mer ABB Mitarbeiter sind’s wichtigste, was die Firma hät! Mer, wo eus de ganz Tag vom Büromaterial bis zum Zahligsiigang vom Chund um alles kümmered, je nach Job 24 Stund erreichbar sind und die Firma letschtendlich mit zu dem gmacht händ, wo sie hüt isch!

Aber vo öppisem chönd mer alli e Schiibe abschniede. De neust Slogan vo de ABB: Let’s write future. Together! Ich möcht mit dene Wort schlüsse und bitt euch drüber nahzdänke, ob mer nöd alli als Wettiger/inne d’Zuekuft ZÄME schriibe chönd!

Vivien Simor / Ihwohnerin vo Wettige / ABB Mitarbeiterin sit 18 Jahr / BBC Chind und sehr, sehr stolz druuf!

Advertisements