Wi chunnt me im Winter mit em Velo sicher uf Bade?

Scho ineme Läserbrief i de Limmatwelle vom 10. November 2016 isch d Frag gstellt worde, ob de Velowäg vo Wettige uf Bade im Winter velotauglich sig. Uslöser für d Frag isch es Schild gsi, wo uf de iigschränkti Winterdienscht ufmerksam machd. Mir hend de Wäg hüt teschted.

2017-01-11-09-38-25

Vo Wettige her isch d Weg fascht frei vo Schnee, danach wird’s abentüürlich

E chli mehr wi viir Millione Franke het d Verbreiterig vom Velowäg nebe de Iisebahnbrugg zwüsche Bade und Wettige choscht. Nebe du Hochbrugg, wo mit em vile Verkehr bi vilne Velofahrer es unguets Gfüehl uslöst, isch es di bescht Verbindug, um mit em Velo vo Wettige us in d Badnere Innestadt z cho. Wo im Herbscht das Schild vom iigschränkte Winterdienscht ufgschtellt worden isch, isch nöd rächt klar gsi, wi guet de Wäg bi Schnee z befahre isch. Mir hend ois us dem Grund hüt uf de Wäg gmached und hend erschtaunlichs feschtgstellt: Uf de Wettiger Site esch de Wäg schwarz gruumet gsi. Scho s Wägli vom Bahnhof her, wo frühner für Velo gschperrt isch gsi, isch vom Schnee befreit gsi und als Velofahrer het me sich chönne sicher füehle. Uf de Brugg isch es e chli schwiriger worde, hets doch Schneerescht geh und de Untergund schint schlüfferiger z si wi de Asphalt vor und nach de Brugg. Uf de Badener Site hend mir dann chönne feschtstelle, dass d Schneerümig vo Wettige her stattgfunde het (es het e paar Meter schwarz gruumte Wäg), danach isch de Zustand für d VelofahrerInne aber zimlich prekär worde, au will de Wäg enger isch und s Chrüze mit Fuesgänger no schwiriger wird.
Isch de Winterdienscht numme uf de Badener Site iigschränkt? Isch es Geldverschwendig, in e Veloverbindig viir Millione Franke z investiire, in aber bi Schnee numme mit eme erhöhte Riskio chönne z nutze? Mir hend di zuständig Gmeindrätin vo Wettige und de Werkhof in Bade aagfröged und werde oich d Antworte mittele, sobald si ois vorliged.

 

Advertisements