De Iiwohnerrot kürzt d Ghälter vo Ammaa, Vizeammaa und Gmeindröt

D Iiwohnerrot het bi sinere hütige Sitzig d Löhn vo allne Mitgliider vom Gmeindrot um 5% kürzt.

De Gmeindrot het in sim Traktandebricht zu de Iiwohnerrotssitzig vom 18. Mai 2017 e Reduktion vo de Entschädigung vo Gmeindammaa und Vizeammaa um 5% vorgschlage gha und e Bibhaltig bi de Entlöhnig für d Gmeindrot empfohle. De Aatrag esch, wi üblich, vo de Finanzkommission (Fiko) gstellt worde. Bi de Ghälter vo Ammaa und Vizeammaa esch de Aatrag vo de Fiko mit em Vorschlag vom Gmeindrot identisch gsi und het de Lohn vom Gmeindammaa vo 248’000.- Franke uf 235’000.- Franke und vom Vizeammaa von 60’000.- Franke uf 57’000.- Franke welle senke. De Aatrag esch vo 39 Iiwohnerröt aagnoh worde, während 7 em Aatrag vom Michael Merkli gfolged sind, wo de Lohn vom Ammaa uf 200’000.- Franke het welle senke.

Anderscht esch es bi de Entschädigung vo de Gmeindröt gsi. Au da het d Fiko e Reduktion um 5% beaatragt. Wil glichzitig diversi Sitzigsgelder zur Strichig vorgschlage worde sind, het d Fiko di 5% bi 48’000,- Franke erfüllt gsi. Dagege het sich d Fraktion SP/WettiGrüen für di 50’000.- Franke usgschproche, wo urschprünglich vom Gmeindrot empfohle worde sind, während de Michael Merkli e Senkig uf 45’000.- Franke beaatragt het. Beidi Aaträg hend vi de Abstimmig kei Chance gha, so dass au hiir de Rot em Aatrag vo de Fiko gfolged esch.

Advertisements