Numme ei Poschtstell z Wettige esch garantiirt

D Poscht esch sehr vorsichtig, wenns um d Formuliirige goht, welli Poschtstell erhalte bliibt und welli wird schlüsse. So heissts im Fall vo Wettig in de offizielle Lischte bi zwei Poschtstelle «Filiale zu überprüfen», bi einere «Filiale garantiert bis 2020».
Es esch dicki Poscht, wo mir da z Wettige überchömmed: Numme ei Poschtstell esch bis 2020 garantiirt und wi es in de Folgejohr usgseht, da wot sich d Poscht scho gar nöd uf d Äscht uselah. Wi mir es am 2. Juni 2017 aatönt hend, wird es wohl d Poschtstell bim Bahnhof, also d Poschtstell Wettige 1 nüm lang geh. Denn d Erfahrig zeiged: «Filiale zu überprüfen» heisst meischt, dass d Filiale gschlosse wird. Das Verdikt trifft z Wettige au no e zweiti Poschtstelle, nämli Wettige 2, a de Bahnhofstrass (oisers Poschtfach gits dann vermuetlech au nümm). Ob d Filiale dann würkli gschlosse werde und bis wann, dazu het Poscht no nüd gsait. De Aargauer Regiirigsrot het d Poscht jedefalls ufgfodered, mit de betroffene Gmeinde z Rede (im Aargau sind 32 Poschtstelle uf de Kippi) und dütlich weniger FIliale z schlüsse.
Im Blick uf Wettige esch e Abhol- und Usgabestell bim Bahnhof vorgseh und immerhin esch ei Poschtstell gsichered, di a de Staffelschtrass. Aber au da esch uffällig, dass d Poscht, wi obbe gschribe, s bestoh vo dere Filiale (und allne andere im Kanton) numme bis 2020, also für di nächschte drü Johr garantiirt.